कळंबा (कोल्हापूर) : कळंबा तलाव परिसरात आज सकाळी एअर गनने झालेल्या हल्ल्यात एक तरूणी जखमी झाली. त्यामुळे गोंधळ आणि घबराटीचे वातावरण निर्माण झाले. घटनास्थळी पोलिसांनी धाव घेवून परिस्थिती नियंत्रणात आणली. जखमी तरूणीला उपचारासाठी सीपीआरमध्ये दाखल केले. या घटनेची नोंद करवीर पोलिस ठाण्यात झाली. हा प्रकार एकतर्फी प्रेमातून घडल्याची चर्चा परिसरात सुरू होती.

याबाबत घटनास्थळी व पोलिसांनी दिलेली माहिती अशी की,

शहरातील एक तरूणी तिच्या नातेवाईकासोबत आज सकाळी कळंबा तलाव परिसरात गेली होती. त्याचवेळी तिच्यावर एअर गनने हल्ला झाला. त्यात ती किरकोळ जखमी झाली. त्यावेळी झालेल्या ओरड्याने नागरिक जमा झाले. तसा हल्लेखोर तेथून पसार झाला. घटनेची माहिती मिळताच करवीर पोलिसांसह स्थानिक गुन्हे शाखेचे पथक दाखल झाले. त्यांनी परिस्थिती नियंत्रणात आणून किरकोळ जखमी झालेल्या तरूणीला उपचारासाठी सीपीआरमध्ये दाखल केले.

दरम्यान हा हल्ला एकतर्फी प्रेमातून झाल्याची चर्चा परिसरात रंगली होती. घटनास्थळाचा पंचनामा करून हल्लेखोराचा शोध पोलिसांनी सुरू केला. याबाबत गुन्हा दाखल करण्याचे काम करवीर पोलिस ठाण्यात सुरू होते.