नागाव : कोरोना संदर्भात वेळोवेळी मिळणार्‍या सूचनांचे काटेकोर पालन करुन आपण आपली सेवा बजावली पाहिजे अशा सूचना विशेष पोलिस महानिरीक्षक डॉ. सुहास वारके यांनी दिल्या. शिरोली एमआयडीसी पोलीस ठाण्यात आयोजित कोरोना योद्धे पोलिस हवालदार संजीत जगताप यांच्या शोकसभेत ते बोलत होते. जिल्हा पोलिस अधीक्षक डॉ. अभिनव देशमुख, अतिरिक्त पोलिस अधीक्षक तिरुपती काकडे, पोलिस उपअधीक्षक डॉ. प्रशांत अमृतकर उपस्थित होते. 

हेही वाचा - जिल्हाधिकाऱ्यांनी केली  पोस्ट :  माझ्याच कुटुंबातील हजारो लोक कोरोनाग्रस्त अन्...

डॉ. वारके म्हणाले, पोलिस कर्मचाऱ्यांनी धास्ती न घेता समाजासाठी लढायचे आणि जिंकायचे आहे. पोलिस हवालदार संजीत जगताप यांच्या कुटुंबासाठी पोलिस दलाच्या वतीने आवश्यक ते सर्व सहकार्य आपण करणार असल्याचा विश्वास त्यांनी दिला.

कोरोनाची लढाई प्रदीर्घ चालणार आहे. त्यामुळे खचून चालणार नाही, असे मत डॉ. अभिनव देशमुख यांनी व्यक्त केले. ते म्हणाले, काळजी घेऊन स्वतःला झोकून घ्यावे लागणार आहे. संकट मोठे आहे. मानसिक दृष्ट्या निर्धाराने याला सामोरे जावे. आजाराला घाबरण्याचे कारण नाही. पण आपल्या शरीरावर त्याची लक्षणे काय परिणाम करतील याबाबत शाश्वतपणे सांगता येत नाही. अशा प्रकारच्या संकटात जिल्हा पोलिस दल आपल्या कर्मचारी आणि त्यांच्या कुटुंबाच्या पाठीशी ठामपणे उभा राहिल असा विश्वास डॉ. देशमुख यांनी व्यक्त केला. 

हेही वाचा -  इचलकरंजीतील सरकारी रुग्णालयात प्रत्येक स्नानगृहासाठी गरम पाण्याची सोय...

यावेळी वरिष्ठ पोलिस अधिकारी यांच्यासह अनेक मान्यवरांनी पुष्पचक्र अर्पण करून मानवंदना दिली.  
यावेळी पोलिस निरीक्षक किरण भोसले, पोलिस उपनिरीक्षक एस. एस. लोखंडे, सहायक फौजदार आर. बी. ठाणेकर, ए. बी. पोवार यांनी मनोगत व्यक्त केले.  

संपादन - स्नेहल कदम