कोल्हापूर : अठराशे ते अडीच हजारांना तलवार, त्यावर चाकू ‘फ्री’... अशी थेट सोशल मीडियावर जाहिरात करून शस्त्रांची विक्री करण्याचा धक्कादायक प्रकार पाहून पोलिसही चक्रावून गेले. शस्त्रांचे कनेक्‍शन राजस्थानपर्यंत पोचले आहे. ही शस्त्रे खरेदी करणाऱ्यांचा शोध घेण्याचे काम सुरू आहे.

हाणामाऱ्यांत तलवारी, गुप्ती, खंजीर, चाकू अशा शस्त्रांचा सहज वापर आता नवा नाही. शहरासह जिल्ह्यात काही वर्षांपासून हे प्रमाण कमी झाले आहे. तरीही पोलिस यंत्रणेचा बेकादेशीर शस्त्र बाळगणाऱ्यांवर व विक्री करण्यावर वॉच असतो. याच अनुषंगाने अंबाई टॅंक परिसरात दोन दिवसांपूर्वी जुना राजवाडा पोलिसांनी कारवाई केली. याप्रकरणी सध्या लक्षतीर्थ वसाहत येथे राहणाऱ्या संशयित किशोर मेस्त्री याच्यावर कारवाई केली. त्याच्याकडून चार तलवारी जप्त केल्या. 

हेही वाचा -  नव्या साखरेची निर्यात कारखान्यांना फायदेशीर ;  दरात क्विंटलला 850 रुपयांची वाढ -

संशयित किशोरकडून धक्कादायक माहिती पुढे आली. तो मूळचा वेंगुर्ला तालुक्‍यातील आहे. तीन दिवसांपूर्वीच त्याने लक्षतीर्थ वसाहतीत कपड्याचे दुकान सुरू केले. त्याने सोशल मीडियावर अठराशे, दोन हजार व अडीच हजारला तलवारी उपलब्ध असून खरेदीवर चाकू, खंजीरही भेट मिळेल, अशी जाहिरात सोशल मीडियाच्या माध्यमातून देऊन शस्त्राची विक्री तो करत होता अशी माहिती पुढे आली.

आतापर्यंत कपडे, बूट, टीव्ही, फ्रीज, दागिन्यांसह गृहउपयोगी वस्तूंची सोशल मीडियावर जाहिरात देऊन विक्री-खरेदी समजू शकतो; मात्र थेट शस्त्राच्या विक्रीबाबतची पोस्ट टाकून त्यावर सवलत देणारी जाहिरात टाकून त्याची विक्री करण्याचा प्रयत्न नवा ठरला. ही शस्त्रे राजस्थानातून आणून विक्री केल्याचे पुढे आले. ही शस्त्रे कोणाच्या मदतीने आणली? कोणाकोणाला विकली? खरेदी करणारे कोण? ते कशासाठी वापर करणार होते? अशा अंगांनी तपास सुरू आहे.

"व्हॉट्‌सॲपच्या माध्यमातून जाहिराती आधारे शस्त्रांची विक्री प्रकरणाचा सखोल तपास सुरू आहे. यातील दोषींवर कडक कारवाई केली जाईल." 

- प्रमोद जाधव, पोलिस निरीक्षक, जुना राजवाडा पोलिस ठाणे

हेही वाचा - शिरोळ तालुक्यात लम्पी आजाराची एंट्री -

संपादन - स्नेहल कदम