कोल्हापूर : शहरातील पुरस्थितीमुळे (kolhapur city) निर्माण झालेल्या पाणी टंचाईमुळे पिण्यासाठीच्या शुद्ध पाण्याचा प्रश्न निर्माण झाला आहे. परिणामी शहरात आणि उपनगरमध्ये अनेक ठिकाणी कार्यरत असणाऱ्या वॉटर एटीएमवर (water ATM) नागरिकांनी गर्दी केली आहे. कोल्हापूर जिल्ह्यामध्ये गेल्या तीन दिवसापासून सुरु असणाऱ्या मुसळधार पावसामुळे (heavy rain) नदीवरील पाणी उपसा केंद्र पुराच्या पाण्यामध्ये गेली आहेत. परिणामी शहरातील व उपनगरातील पाणीपुरवठा अनिश्चित काळासाठी खंडित करण्यात आला आहे. यामुळे नागरिकांच्या पिण्याच्या पाण्याचा प्रश्न निर्माण झाला आहे. (kolhapur flood live)

महानगर पालिकेने टँकरने पाणीपुरवठाही सुरु केला आहे. असे असले तरीही शुद्ध पेय जलसाठी जागोजागी असणाऱ्या वॉटर एटीएम समोर नागरिक गर्दी करू लागले आहेत. १ रुपये प्रति लिटर याप्रमाणे हे पाणी विक्री केली जात आहे. या सेंटर समोर नागरिक वॉटर कॅन घेऊन थांबले आहेत. काहींनी कॅन रांगेमध्ये ठेऊन आपला नंबर येण्याची वाट बघत असल्याचे चित्र आहे.

सकाळ पासून पावसाने उघडीप दिली असल्यामुळे नागरिक बाहेर पडले आहेत. या मुळे वॉटर सेंटरवर अधिक गर्दी दिसत आहे. नागरिकांच्या सततच्या वाढत्या मागणीमुळे काही वॉटर एटीएम सेंटरवरील पाणी संपले आहे. शुद्धीकरण करून पुन्हा सेंटर सुरु होण्यासाठी किमान ३ तासांचा अवधी लागत असल्यामुळे नागरिक दुसऱ्या सेंटरकडे धावत आहेत. पडणाऱ्या पावसाचे पाणी साठवून त्याचा वापर खर्चाच्या पाण्यासाठी तसेच काही जण पिण्याच्या पाण्यासाठी करत आहेत. मात्र पाऊस देखील थांबल्यामुळे या पाण्याचा प्रश्न निर्माण झाला आहे.