कोल्हापूर - पन्हाळा येथील वसंतराव भिकाजी कुलकर्णी यांचे वयाच्या 82 व्या वर्षी अल्पशा आजाराने निधन झाले. शासकीय सेवेमध्ये 35 वर्षांपेक्षा जास्त काळ सेवा बजावताना मंत्रालय व राज्य भवन येथे विविध जबाबदाऱ्या सक्षमपणे पार पाडल्या व आपल्या कामाचा ठसा उमटवला. शरद पवार ते आर. आर. पाटील तसेच इतर अनेक मंत्र्यांच्याकडे खाजगी सचिव म्हणून काम केले. संत गाडगेबाबा ग्रामस्वच्छता अभियानाअंतर्गत ग्रामविकास उपसचिव म्हणून काम करीत असताना भरीव योगदान दिले. त्यानंतर महाराष्ट्राच्या महामहीम राज्यपालांचे खाजगी सचिव म्हणून 5 वर्षे सेवा बजावून सेवानिवृत्त झाले.

वाचा - रंकाळयावरील झाडांचा नववा वाढदिवस उत्साहात ; सकाळचा उपक्रम...

सेवानिवृत्तीनंतर पन्हाळा मुक्कामी राहून ज्योतिषशास्त्र व फेंगशुईचा अभ्यास करून अनेकांना मार्गदर्शन केले. तसेच त्यांची विविध विषयातील अनेक पुस्तके प्रकाशित झाली आहेत. आपल्या सेवा अनुभवाचा सामान्य लोकांसाठी त्यांच्या शासकीय स्तरावरील कामांमध्ये पुरेपूर उपयोग करून दिला.

त्यांच्या पश्चात पत्नी प्रभा, मुलगा, मुलगी, सून, जावई, नातवंडे असा मोठा उच्चशिक्षित परिवार आहे. मुलगा मिलिंद हा परदेशी मुक्कामी असल्याने कन्या डॉ. मेघा यांनी पार्थिवास मैत्रोग्नी दिली.