गडहिंग्लज : तालुक्‍यातील लिंगनूर कसबा नेसरी येथील एका 75 वर्षीय वृद्धेचा कोरानाने मृत्यू झाला. आता गडहिंग्लजमधील कोरोनाच्या बळींची संख्या चारवर पोहचली आहे. दरम्यान, या वृद्धेचा नातूही पॉझिटिव्ह आला असून त्याला खासगी संस्थात्मक क्वारंटाईन करण्यात आले आहे. शिवाय गडहिंग्लज शहरातील भडगाव रोडवरील आयसीयूमधील एका वॉर्ड बॉयचा अहवाल आज पॉझिटिव्ह आला. तो येथील म. दुं. श्रेष्ठी विद्यालयात क्वारंटाईन होता. त्याला शेंद्री माळावरील कोवीड सेंटरमध्ये उपचारासाठी नेले आहे. त्याच्या कुटुंबातील सदस्यांचेही स्वॅब घेण्यात येणार आहेत. या रुग्णामुळे आता शहरातील बाधितांची संख्या 11 वर पोहचली आहे. 

गेल्या आठवड्यात मृत वृद्धेला कोरोनाची लक्षणे दिसत होती. त्यांना रविवारी (ता. 5) थेट कोल्हापुरातील डी. वाय. पाटील हॉस्पीटलमधील कोविड सेंटरमध्ये नेले होते. त्यांचा मंगळवारी (ता. 7) सायंकाळी मृत्यू झाला. कोल्हापुरातच अंत्यविधी झाले. स्वॅबचा अहवाल पॉझिटिव्ह आल्यानंतर तिच्या कुटूंबातील लोकांनाही क्वारंटाईन करून स्वॅब घेतले होते. त्यातील तिच्या चौदा वर्षीय नातवाचा अहवाल कालच (ता. 8) रात्री पॉझिटिव्ह आला आहे. दरम्यान, ती कुठेही प्रवास केलेली नव्हती. त्यामुळे तिला लागण कशी झाली, याचा शोध आरोग्य विभाग घेत आहे. शेजारच्या बुगडीकट्टी गावात कोरोना रूग्ण होते. तालुक्‍यात यापूर्वी चन्नेकुप्पी, यमेहट्टी आणि हेब्बाळ जलद्याळ येथील प्रत्येकी एकाचा कोरोनाने मृत्यू झाला आहे. लिंगनूरच्या वृद्धेच्या मृत्यूने तालुक्‍यातील बळींची संख्या चारवर पोहचली आहे. तालुक्‍यातील बाधितांची संख्याही 115 वर पोहचली आहे. 

दरम्यान, गेल्या आठवड्यात शहरातील एकाच आयसीयूतील नऊ जण बाधित आढळले होते. त्यांच्या प्रथम संपर्कात आलेल्यांचे स्वॅब निगेटिव्ह आले आहेत. संबंधित वॉर्डबॉयचा अहवाल आज आला. संबंधित वॉर्डबॉय 41 वर्षीय असून तो स्थानिक आहे. राजेंद्र प्रसाद रोडवरील बाधित डॉक्‍टरांच्या प्रथम संपर्कात आलेल्या शहरातील बहुतांश जणांचे अहवाल प्राप्त झाले असून ते सर्व निगेटिव्ह आहेत. अजूनही 22 जणांचे अहवाल प्रलंबित आहेत. 

संपादन : सचिन चराटी