कोल्‍हापूर : राज्याचे वैद्यकीय शिक्षणमंत्री तथा पालकमंत्री हसन मुश्रीफ यांनी संताजी घोरपडे साखर कारखान्यासाठी लोकांकडून पैसे संकलित केले. मात्र हे पैसे ‘शेल’ कंपन्यांत गुंतवून शेतकऱ्यांची फसवणूक केली असल्याची टिपणी सक्तवसुली संचालनालयाच्या (ईडी) विशेष न्यायालयाने (पीएमएलए) केली आहे.

न्यायालयाच्या या टिपणीमुळे मुश्रीफ यांच्या अडचणीत वाढ होणार असल्याचे सांगण्यात येत आहे. तसेच या प्रकरणात अटकेत असलेला सनदी लेखापाल महेश गुरव याचा जामीनही विशेष न्यायालयाने फेटाळला आहे. सरसेनापती संताजी घोरपडे साखर कारखान्याची उभारणी करण्यासाठी शेतकऱ्यांकडून पैसे जमा करण्यात आले.

मात्र हे पैसे खासगी कंपन्यांमध्ये गुंतवण्यात आले. या ‘शेल’ कंपन्यांच्या संचालक मंडळात मंत्री मुश्रीफ यांची मुले कार्यरत आहेत. अशाप्रकारे मंत्री मुश्रीफ यांनी शेतकऱ्यांची फसवणूक केल्याचे प्रथमदर्शनी स्‍पष्‍ट होत असल्याचे निरीक्षण ‘ईडी’ने नोंदवले आहे.