कोल्हापूर : मोठ्या परताव्याचे आमिष दाखवून पावणेदोन कोटींची फसवणूक केल्याप्रकरणी मुंबईतील कंपनीच्या पाच जणांवर जुना राजवाडा पोलिसांत गुन्हा दाखल झाला. पांडुरंग बाळासाहेब पाटील (वय ३९, रा. सादळे, ता. करवीर) यांनी फिर्याद दिली. हा गुन्हा मुंबई आर्थिक गुन्हे शाखेकडे वर्ग करण्यात आला. 

समीर जोशी, सुरेश पवार, जैसन रॉड्रीक, प्रेम चौधरी, अभिजित दुधवडकर (सर्व रा. मुंबई) अशी गुन्हा दाखल झालेल्या संशयितांची नावे आहेत. याबाबत पोलिसांनी दिलेली माहिती अशी, संशयित समीर जोशी, सुरेश पवार, जैसन रॉड्रीक, प्रेम चौधरी, अभिजित दुधवडकर हे पाच जण मुंबईत राहतात. त्या पाच जणांनी ‘टेक प्रॉफिट’ नावाची कंपनी सुरू केली.

हेही वाचा - सत्तासुंदरी नसल्याने शेलार आणि दरेकर देवदास झालेत -

शेअर मार्केटींगमधील गुंतवणुकीवर चांगला परतावा मिळवून देतो असे आमिष दाखवून त्यांनी गुंतवणूकदारांना आकर्षित केले. गुंतवणुकीसाठी एक ॲप्लिकेशनही उपलब्ध करून दिले. सुरवातीला पांडुरंग पाटील यांनी त्यांच्याकडे १८ लाखांची गुंतवणूक केली. त्यांना सुरवातीला चांगला परतावाही कंपनीने दिला.

ते पाहून इतर गुंतवणूकदारांनीही कंपनीत एकूण १ कोटी ७५ लाख १४ हजार ८६६ रुपयांची गुंतवणूक केली; पण या सर्वांना मुदत संपूणही परतावा अगर मुद्दल मिळाली नाही. हा प्रकार सप्टेंबर २०१९ ते २० ऑक्‍टोबर २०२० अखेर घडला अशी फिर्याद पाटील यांनी दिली. त्यानुसार संबंधित कंपनीच्या पाचही संशयितावर फसवणुकीसह महाराष्ट्र ठेवीदार हितसंबध प्रतिबंधक कायदा १९९९ चे कलम ३ प्रमाणे गुन्हा दाखल करण्यात आला.

हेही वाचा - मैत्रिणीने बोलणे टाळले म्हणून त्याने उचलेले धक्कादायक पाऊल -

संपादन - स्नेहल कदम