कुरुंदवाड (कोल्हापूर) : शिवसेनेचे शिरोळ तालुकाप्रमुख वैभव उगळे यांच्या नावे काल सायंकाळी आलेल्या पार्सलमध्ये बॉम्बसदृश साहित्य आढळल्याने एकच खळबळ उडाली. पोलिस व प्रशासनाची धावपळ उडाली. पोलिसांनी पार्सल तबक उद्यानातील खुल्या जागेत ठेवले व कोल्हापुरातून बॉम्बशोध पथक बोलाविले. रात्री पथकाच्या पडताळणीत पार्सलमध्ये साधे घड्याळ, काही वायरींचे सर्किट व फटाक्‍यांची दारू आढळली. त्यामुळे सर्वांनी सुटकेचा निःश्‍वास टाकला. 

सायंकाळी उगळे यांच्या नावे पार्सल व फुलांचा बुके घेऊन एक वृद्ध व्यक्ती सांगलीहून रिक्षातून कुरुंदवाडला आली. पार्सलवर ‘विजय भुवन (हॉटेल) भालचंद्र थिएटर’ असा पत्ता होता. हॉटेल मालकाने बॉक्‍स पाहून उगळे यांना कल्पना दिली. उगळेंनी त्या व्यक्तीस थांबवून ठेवत पोलिसांना कळविले. पोलिस निरीक्षक चंद्रकांत निरावडे फौजफाट्यासह आले. त्यांनी वरिष्ठांना माहिती दिली. पोलिसांनी पार्सल तबक उद्यानातील मैदानात ठेवले. तोपर्यंत ही बातमी पसरली व मोठा जमाव गोळा झाला. 

हेही वाचा - त्या सहभागाबद्दल देवेंद्र फडणवीस यांचीही चौकशी व्हावी : जयंत पाटील

इचलकरंजी विभागीय पोलिस अधिकारी बाबूराव महामुनी घटनास्थळी आले. रात्री कोल्हापूरहून बॉम्बशोध पथक आले. त्यातील मानसिंग पाटील, विनायक लाड, आशिष मिठारे, रवींद्र पाटील, ओंकार पाटील, जयंत पाटील, विनायक डोंगरे, मुस्ताक शेख यांनी सामग्री लावून वस्तूंची पाहणी केली. त्या निकामी केल्या. हे साहित्य पोलिसांनी ताब्यात घेतले. पार्सल घेऊन आलेल्या व्यक्तीची पोलिसांनी चौकशी सुरू केली आहे.