दौलतच्या जमिनीबाबतचा आरोप खोडसाळपणाचा
ःगोपाळराव पाटील ः मानसिंग खोराटे यांच्या आरोपाला प्रत्युत्तर

सकाळ वृत्तसेवा
चंदगड, ता. १० ः दौलत कारखान्याच्या जमिनीसंदर्भात अथर्व इंटरट्रेड कंपनीचे अध्यक्ष मानसिंग खोराटे यांनी केलेला आरोप खोडसाळपणाचे आहेत असे प्रत्युत्तर कारखान्याचे ज्येष्ट संचालक गोपाळराव पाटील यांनी दिले. कारखाना चालवायला घेतल्यापासून खोराटे सातत्याने विपर्यस्त विधाने करुन स्थानिक राजकीय वातावरण गढूळ करण्याचा प्रयत्न करीत आहेत. कारखाना चांगला चालवणे एवढेच त्यांचे काम आहे. त्यांनी ते व्यवस्थित करावे. इतर विषयात ढवळाढवळ करु नये असा इशाराही त्यांनी दिला. आज येथे पत्रकार परिषद घेऊन त्यांनी आपली बाजू मांडली.
खोराटे यांनी दोन दिवसापूर्वी कारखान्यावर झालेल्या कार्यक्रमात दौलत विश्वस्थ संस्थेच्या नावे चाळीस एकर जमिन हडप करण्याचा आरोप करुन आपण हा प्रयत्न हाणून पाडला असल्याचे सांगितले होते. त्यावर पाटील यांनी आज खुलासा केला. कारखान्याने 1983 साली विश्वस्थ संस्थेच्या नावे वीस एकर जमिन नव्यानव्व वर्षाच्या कराराने दिली आहे. त्या जागेत महाविद्यालय आहे. शासन आणि युजीसीच्या विविध योजना राबवताना ही जमिन संस्थेच्या नावे आवश्यक असते. त्यासाठी म्हणून 2011 साली झालेल्या सर्वसाधारण सभेत सभासदांच्या मतानुसार ती संस्थेच्या नावे करण्याचे ठरले होते. त्यामध्ये हडप करण्याचा कोणताही हेतू सल्याचे स्पष्ट केले. कारखान्याचे अध्यक्ष अशोक जाधव, उपाध्यक्ष संजय पाटील उपस्थित होते.