जयसिंगपूर : सन २०२२-२३ या गळीत हंगामातील गाळप झालेल्या उसाला (Sugarcane) दुसरा हप्ता १०० रुपये व ५० रुपये देण्याच्या प्रस्तावास शासनाने (Maharashtra Government) मान्यता दिली. याबाबत साखर आयुक्तांना तसा आदेश सोमवारी (ता. ३०) देण्यात आला.

स्वाभिमानी शेतकरी संघटनेकडून (Swabhimani Shetkari Sanghatana) ही मागणी सातत्याने करण्यात येत होती. गतवर्षी झालेल्या आंदोलनात २०२२-२३ या हंगामातील गाळप झालेल्या ऊस उत्पादक शेतकऱ्यांना (Farmers) प्रतिटन १०० रुपयांचा दुसरा हप्ता देण्याबाबत तोडगा निघाला होता. या प्रस्तावास शासनाने मान्यता न दिल्यामुळे शेतकऱ्यांना पैसे मिळू शकले नव्हते. गेल्या दहा महिन्यांपासून मुख्य सचिवांकडे हा प्रस्ताव दाखल करण्यात आला होता.

मुख्यमंत्र्यांचा आज (ता. १) जिल्हा दौरा आहे. त्या पार्श्वभूमीवर हा आदेश झाला आहे. गतवर्षी प्रतिटन तीन हजारांपेक्षा जास्त दर दिलेल्या कारखानदारांना पन्नास रुपये तर तीन हजारांपेक्षा कमी दर दिलेल्या कारखान्यांना शंभर रुपये शेतकऱ्यांना द्यावे लागणार आहेत. या आदेशामुळे कोल्हापूर आणि सांगली जिल्ह्यातील शेतकऱ्यांना जवळपास सहाशे कोटींची रक्कम मिळणार आहे.