जयसिंगपूर (कोल्हापूर) : कोरोना लस (covid 19) वाटपामध्ये नांदणी आरोग्य केंद्राकडून वारंवार अनियमितता व पक्षपातीपणा होत असल्याचा आरोप करीत (Shirdhon)शिरढोण (ता. शिरोळ) ग्रामपंचायतचे सदस्य व गावातील सामाजिक कार्यकर्त्यांनी नांदणी आरोग्य केंद्रात ठिय्या आंदोलन करून अधिकाऱ्याना धारेवर धरले. अधिकारी व आंदोलक यांच्यामध्ये शाब्दिक वादावादी झाल्याने काही काळ वातावरण तणावग्रस्त बनले. (gram-panchayat-members-and-social-workers-agitation-at-nandani-covid-19-health-center-kolhapur-news)

शिरढोणसह इतर सहा गावांचा समावेश नांदणी आरोग्य केंद्रात करण्यात आला आहे. शिरढोणच्या लोकसंख्येच्या प्रमाणात व इतर गावांच्या तुलनेत शिरढोणची लसीकरणाची टक्केवारी ४६.६३ टक्के इतकी असून ती फारच कमी झाली. तथापि इतर गावांची लसीकरणाची टक्केवारी यापेक्षा जास्त असताना देखील आरोग्य केंद्रातील अधिकाऱ्यानी त्याच गावांना आज लसीचे वाटप केले असून शिरढोणला लस दिली नाही. याचा जाब आंदोलकांनी विचारला. सुरूवातीला अधिकाऱ्यानी उडवाउडवीची उत्तरे दिली. आंदोलकांनी अधिकाऱ्याना खोलीत कोंडून घालण्याची योजना आखली तेव्हा अधिकारी नमले व वस्तूस्थिती मान्य केली.

शासनाकडून आरोग्य केंद्राला जास्तीत जास्त लस पुरवठा करावा यासाठी आंदोलक आक्रमक झाले होते. त्यांनी मंद लसीकरणाला सरकार दोषी असल्याने सरकारचा जाहीर निषेध करून सरकार विरोधात घोषणाबाजी केली. शेवटी आंदोलक व शिरोळचे आरोग्य अधिकारी दातार यांच्यात फोनवरून चर्चा झाली. वैद्यकीय अधिकारी सौ. अस्वले यांनी नजीकच्या काळात शिरढोणच्या लसीकरणाची टक्केवारी वाढविण्याबाबत लेखी आश्वासन दिल्याने पुढील अनर्थ टळला. येथून पुढे लसीची संख्या मुबलक प्रमाणात उपलब्ध करून न दिल्यास नांदणी आरोग्य केंद्राला भविष्यात कुलूप लावून आंदोलन करण्याचा इशारा आंदोलकानी दिला.

हेेही वाचा- व्यापारी भडकले; कोल्हापुरात सोमवारपासून व्यापार सुरूच!

आंदोलनात भास्कर कुंभार, विश्वास बालिघाटे, शहाबुदिन टाकवडे , नागेश कोळी , साहीर बाणदार , शक्ती पाटील , पंकज कुंभार , अरिहंत कापसे, हैदरअली मुजावर , राजु नदाफ, रणजित यादव, रावसो बिरोजे यासह अनेक ग्रामस्थ सहभागी होते.