कोल्हापूर : ‘बिद्री’ साखर कारखान्यावर (Bidri Sugar Factory) उत्पादन शुल्क विभागाने केलेली कारवाई चुकीची असून, याचा मी निषेध करत आहे. कारखान्याचे अध्यक्ष के. पी. पाटील हे महाविकास आघाडीकडे जात आहेत म्हणून अशी कारवाई अयोग्य आहे. छापा टाकायचाच असेल, तर तो थेट के. पी. पाटील (K. P. Patil) यांच्या घरावर टाकावा, ६५ हजार सभासद असलेल्या साखर कारखान्यावर कशाला? अशा शब्दात पालकमंत्री हसन मुश्रीफ यांनी राज्य सरकारला येथे घरचा आहेर दिला. तसेच याबाबत वरिष्ठ नेत्यांशी व संबंधित मंत्र्यांशी बोलणार असल्याचेही त्यांनी सांगितले.

जिल्हाधिकारी कार्यालय येथे त्यांनी माध्यमांशी संवाद साधला. ‘या कारवाईमुळे के. पी. यांना जास्त सहानुभूती मिळणार आहे. के. पी. यांनी लोकसभा निवडणुकीत प्रा. संजय मंडलिक यांचा प्रचार केला आहे. असे असताना त्यांनी थेट खासदार श्रीमंत शाहू छत्रपती महाराज यांचे स्वागत करणे अयोग्य आहे. याबद्दल त्यांना कठोर शब्दात बोललो आहे. त्यांनी थोडे थांबायला हवे होते. उत्पादन शुल्क विभागाने ज्या पद्धतीने कारवाई केली, तिथे संशयाला जागा आहे, असे पालकमंत्री मुश्रीफ (Hasan Mushrif) यांनी स्पष्ट केले.

मंत्री मुश्रीफ म्हणाले, ‘वीज प्रीपेड मीटर व शेतीचे प्रीपेड मीटर यासंदर्भात जनभावना लक्षात घेऊन सरकार निर्णय घेईल. शक्तिपीठ महामार्गाबाबत मुख्यमंत्र्यांनी भूमी संपादन थांबविण्याचे निर्देश दिले आहेत. सर्व समाजांना आरक्षण मिळावे, ही महायुतीतील तिन्ही पक्षांची भूमिका आहे.’

‘हद्दवाढ’ निर्णय विधानसभेपूर्वी होण्याबाबत साशंकता

कोल्हापूर शहरालगतच्या सहा गावांना घेऊन सुरुवातीच्या टप्प्यात हद्दवाढ करण्याचा प्रयत्न होता; परंतु लोकसभा निवडणुकीच्या आचारसंहितेमुळे हा विषय थांबला. विधानसभा निवडणूक जवळ आली आहे. त्यामुळे या निवडणुकीपूर्वी हा प्रश्‍न कितपत मार्गी लागेल, याबाबत साशंकता असल्याचे मुश्रीफ यांनी सांगितले.