कोल्हापूर : राज्यात पावसाची जोरदार बॅटींग सुरू आहे, सर्वत्र कोसळत असलेल्या पावसामुळे अनेक ठिकाणचे जनजीवन विस्कळीत झालं आहे. दरम्यान पावसाची पर्वा न करता जिल्हा परिषदेच्या आरोग्य कर्मचारी कर्तव्यात खंड पडू देत नाहीयते. पडणाऱ्या पावसात घरोघरी जात लसीकरण करणाऱ्या आरोग्य सेविकांचा व्हिडिओ सध्या सोशल मिडीयावर व्हायरल होत आहे. पाणी आणि चिखलात वाट तुडवत या सेविका पायपीट करताना या व्हिडीओत दिसत आहेत.

मिळालेल्या माहितीनुसार, सध्या लहान मुलांचे लसीकरण आणि हर घर दस्तक या मोहिमेच्या माध्यमातून कोरोना विरोधातील लसीकरण मोहीम राबवली जात आहे. दरम्यान कोल्हापूर जिल्ह्यातील आजरा तालुका भादवण प्राथमिक आरोग्य केंद्राच्या अंतर्गत पेरणोली उपकेंद्र आहे. या उपकेंद्राच्या अंतर्गत असलेले शंभरहून अधिक धनगरवाड्यांमध्ये पायपीट करत जावे लागते. सध्या मोठ्या प्रमाणात पडत असलेल्या पावसात देखील आरोग्य साहाय्यक पी. आर. नाईक, डी. एस. गोविलकर, रेखा दोरुगडे आणि लक्ष्मी जाधव या धनगरवाड्यावरच्या पोरांच्या लसीकरणासाठी अव्याहतपणे झटत आहेत.

जंगलातून तब्बल साडेतीन ते चार किलोमीटरचा पायी प्रवास करून या महिली कर्मचारी भर पावसात सेवा बजावत आहेत, दरम्यान त्यांचा हा व्हिडीओ सोशल मिडीयावर व्हायरल झाला आहे. नेटकऱ्यांकडून या आरोग्यसेविकांचे मोठ्या प्रमाणात कौतुक केले जात आहे.