कोल्हापूर - गेल्या महिन्याभरापासून दडी मारलेल्या पावसाने जोरदार पुनरागमन केले असून आज शहरासह जिल्ह्याच्या ग्रामीण भागातही दमदार पाऊस सुरू आहे. दुपारी शहरात सोसाट्याच्या वाऱ्यामुळे मध्यवर्ती बसस्थानक परिसरातील महालक्ष्मी चेंबर्ससमोरील एक मोठे झाड चार गाड्यांवर पडून गाड्यांचे मोठे नुकसान झाले. या गाड्यात कोण नसल्याने सुदैवाने कोण जखमी झाले नाही. 

याशिवाय शास्त्रीनगर, टॉऊन हॉल चौकातही रस्त्यावर झाडे उन्मळून पडल्याने वाहतूक कोंडी झाली. सकाळी नऊ वाजता शास्त्रीनगर परिसरात एक झाड कोसळले. दुपारी एक वाजता पंचायत समितीसमोरील एक झाड पडले. दुपारी साडेतीनच्या सुमारास महालक्ष्मी चेंबर्ससमोरील मोठे झाड कोसळले. या झाडाखाली चार चारचाकी गाड्या सापडल्या, या गाड्यांचे मोठे नुकसान झाले. महापालिकेच्या अग्नीशमक दलाने कटरच्या सहाय्याने हे झाड तोडून त्याखाली सापडलेल्या गाड्या बाहेर काढल्या आणि रस्ता रिकामा केला. 

हे पण वाचा -  कोणत्याही क्लासशिवाय कोल्हापूरच्या पठ्ठ्याने मिळविले यूपीएससीत लखलखीत यश

जिल्ह्यात सर्वदूर पाऊस असून नद्यांच्या पातळीतही मोठी वाढ झाली आहे. पंचगंगेची पातळी 24 तासांत दहा फुटांनी वाढली असून या नदीवरील राजाराम बंधारा आज तिसऱ्यांदा पाण्याखाली गेला. ग्रामीण भागातही पावसाचा जोर आहे. पावसाने ओढ दिल्याने जिल्ह्यातील खरीप हंगामातील पिके धोक्‍यात आली होती, त्यामुळे चिंतेत असलेला बळीराजा पावसाने जोर धरल्याने सुखावला आहे. 

संपादन - धनाजी सुर्वे