नानीबाई चिखली (कोल्हापूर) - महिलांवर होणाऱ्या अत्याचारांचे प्रमाण वाढले आहे. रस्त्यावरून जाताना त्यांना असुरक्षितता जाणवते. त्यांची सुरक्षिततेची हीच गरज ओळखत कुरली (ता. निपाणी) येथील शिक्षक एस. एस. चौगुले यांनी ‘सेल्फ प्रोटेक्‍शन टेक्‍नॉलॉजी फॉर लेडीज’ हे नावीन्यपूर्ण सॅंडल्स बनविले आहे. त्यांच्या या उपकरणाची दखल दक्षिण भारत विज्ञान प्रदर्शनामध्ये घेऊन त्यांना सन्मानित केले.

रयत शिक्षण संस्थेच्या कुरली शाखेतील उपक्रमशील विज्ञान शिक्षक म्हणून चौगुले परििचत. त्यांनी नेहमीच संशोधक वृत्तीस चालना देताना विज्ञान प्रदर्शनाच्या माध्यमातून अनेक उपकरणांची निर्मिती केली. यावेळी त्यांनी बनविलेल्या नावीन्यपूर्ण उपकरणाची सर्वत्र चर्चा आहे. 

‘सेल्फ प्रोटेक्‍शन टेक्‍नॉलॉजी फॉर लेडीज’

महिलांवर होणाऱ्या अत्याचारांचा विचार करीत यावेळी त्यांनी डिजीटल इंडिया विभागात विज्ञान, तंत्रज्ञान याचा वापर करीत टाकाऊ वस्तूपासून महिला, विद्यार्थिनींसाठी ‘सेल्फ प्रोटेक्‍शन टेक्‍नॉलॉजी फॉर लेडीज’ हे स्वसंरक्षण करणारे 
सॅंडल्स बनविले. सॅंडल्समध्ये त्यांनी जुना मोबाईल बसविला आहे. यामुळे महिला कोठेही असली तरी तिची माहिती यामधील मोबाइलवर मिळते. ज्यावेळी महिला अडचणीत असतील त्यावेळी याच्या माध्यमातून त्या घरी किंवा पोलिसांना संपर्क साधू शकतात. 

सॅंडल्सला दोन स्वीच...

या सॅंडल्समध्ये टाचेच्या बाजूस असलेला मोबाईल ब्लूटूथ, वायफायद्वारे जोडला आहे. यामध्ये दोन स्वीच असून एक बाजूस व दुसरा अंगठ्यासमोर स्वतंत्र बसवला आहे. जेव्हा महिला बाहेर जातील तेव्हा सॅंडल्समधील फोनवर घरातील व्यक्तीने मिस्ड कॉल द्यायचा. त्यांना कामावरून येण्यास उशीर झाला अगर एखादी व्यक्ती त्यांच्याशी गैरवर्तन करू लागली तर अंगठ्यासमोरील स्विच दाबायचा. त्यामुळे मिसकॉल दिलेल्या मोबाईलवर कॉल जातो. कॉल मिळाल्यानंतर घरातील व्यक्तीस जीपीएसव्दारे महिलेचे स्थान, अंतर समजते. त्यामुळे तत्काळ तिला मदत मिळते. 

महिलांवरील अत्याचाराच्या घटना थांबविण्यासाठी शासन स्तरावर प्रतिबंधात्मक उपाय शोधले जात आहेत. याचाच एक भाग म्हणून सॅंडल्सची संकल्पना मनात आली. संकल्पना प्रत्यक्षात उतरविल्यानंतर विज्ञान प्रदर्शनात त्याचे कौतुक झाले. याचा महिलांना फायदा झाला तर निश्‍चितच आनंद होईल. 
- एस. एस. चौगुले, विज्ञान शिक्षक