कोल्हापूर : कोणी कितीही दिशाभूल करू देत; पण पालकमंत्री सतेज पाटील आणि ग्रामविकासमंत्री हसन मुश्रीफ यांच्या पुढाकाराने ‘गोकुळ’साठी मुंबई, वाशी व भोकरपाडा येथे घेतली जाणारी जमीन शेतकऱ्यांच मालकीची राहील. त्यातून संघाची भरभराट होण्यास निश्‍चित मदत होईल असा विश्‍वास ज्येष्ठ संचालक अरुण डोंगळे यांनी व्यक्त केला. गोकुळच्या वार्षिक सर्वसाधारण सभेवेळी ते बोलत होते.

डोंगळे म्हणाले, ‘‘एन.डी.डी.बीचे कर्ज ३२ कोटीचे आहे. त्याची परतफेडीची मुदत दोन वर्षाची आहे. कोणी तरी दिशाभूल करण्यासाठी १५० ते १७५ कोटींचे कर्ज असल्याचे चुकीचे सांगत आहे. माजी अध्यक्ष आनंदराव पाटील-चुयेकर गोकुळ शिरगावची जागा घेतानाही लोकांनी विरोध करत १५ एकर जागा कशासाठी अशी विचारणी केली; पण चुयेकर यांनी कोणाचेही न ऐकता १५ एकर जागा घेतली. पशुखाद्यासाठी जागा घेतानाही विरोध झाला. आज ही जागाही गोकुळला कमी पडत आहे. भविष्याच्या विचार करता, सरकारी दरात ऐवढी जमिन मिळाली नसती.’’

कार्यकारी संचालक डी. व्ही. घाणेकर म्हणाले, ‘‘गोकुळचे संकलन चौदा लाखांपर्यंत आहे. ते २० लाखापर्यंत जाईल. गोकुळ दुधाला बाहेर प्रचंड मागणी आहे. अशावेळेला आतापासूनच नियोजन केले पाहिजे. मुंबई, वाशी व भोकरपाडा येथे जमिन घेत आहे. संचालक मंडळाने दूध उत्पादकांच्या हितासाठी हा धाडसी निर्णय घेतला आहे. काहीही झाले तर हे काम करायचे आहे. यामध्ये शासनाची जमिन कमी दरात मिळण्यासाठी पालकमंत्री पाटील व ग्रामविकासमंत्री मुश्रीफ यांच्यामुळे मदत झाली आहे. खासगीमध्ये ही जमीन खरेदी केली तर यापेक्षा वीस पट आपल्याला पैसे द्यावे लागतील.’’

छोटी डेअर उभारणार

मुंबईमध्ये आपण छोटी डेअरीच उभाणार आहोत. यामुळे दह्याचे पॅंकिंग करता येणार आहे. आपण स्वाभिमानाने आपले पॅकिंग करता येणार आहे. कोणाला त्यासाठी पैसे मोजावे लागणार नसल्याचेही श्री घाणेकर यांनी सांगितले.