खानापूर (बेळगाव) - तालुका पंचायत सदस्या पुष्पा नाईक यांचे पती दिलीप विश्वनाथ नाईल (वय 55, रा.कणकुंबी) यांनी पतसंस्थेच्या कार्यालयात गळफास घेऊन आत्महत्या केल्याची घटना आज सकाळी उघडकीस आली. त्यांच्या आत्महत्येमागील कारण समजू शकलेले नाही. खानापूर पोलिसात घटनेची नोंद झाली असून अधिक तपास सुरू आहे.

याबाबत पोलिसांकडून समजलेली अधिक माहिती अशी, दिलीप नाईक यांनी घराचा कांही भाग एका पतसंस्थेला भाडे तत्वावर दिला आहे.

रात्रीच्या वेळी ते त्या कार्यालयात झोपत असत. नेहमीप्रमाणे ते काल शुक्रवारी (ता. 03) ते झोपायला गेले. सकाळी उशिरापर्यंत ते उठून न आल्याने मुलगा त्यांना उठवायला गेला. त्यांनी पंख्याला गळफास घेतल्याचे आढळले. घटनेची माहिती मिळताच पोलिस निरीक्षक बसगौडा पाटील यांनी कर्मचाऱ्यासह घटनास्थळी जाऊन पंचनामा केला. येथील सरकारी रुग्णालयात शवचिकित्सा करून मृतदेह नातेवाईकांकडे सोपविण्यात आला.

आज सायंकाळी (ता.04) त्यांच्यावर कणकुंबीत अंत्यसंस्कार करण्यात आले. त्यांच्या पश्चात पत्नी, दोन मुलगे आणि विवाहित मुलगी असा परिवार आहे. पोलिस या घटनेचा अधिक तपास करीत आहेत.