इचलकरंजी (कोल्हापूर) : तेलंगणा राज्यातून रुग्णवाहिकेमधून पहाटेच्या सुमारास इचलकरंजीत दोघेजण दाखल झाले. शेजारी राहणाऱ्या नागरीकांच्या सतर्कतेमुळे हा प्रकार उघडकीस आला. या प्रकारानंतर प्रशासनाची तारांबळ उडाली. 

पालिका प्रशासनासह गावभाग पोलिसांनी त्यांचा शोध घेवून ताब्यात घेतले. पारसमल मेहेरसिंग राजपुरोहित (वय ३०, रा. सिनेर, राजस्थान) व मोहनसिंग वितरसिंग राजपुरोहित (२४, रा. बीजेपी मार्केट, इचलकरंजी) अशी दोघांची नावे आहेत. त्या दोघांसह अनोळखी रुग्णवाहिका चालकावर गुन्हा दाखल करण्यात आला आहेत. तर दोघांची प्राथमिक तपासणी करून त्यांना पंचरत्न विलगीकरण केंद्रात दाखल करण्यात आले.

हेही वाचा- सकाळ ब्रेकिंग ; कोल्हापुरात सापडाल आणखी एक कोरोना पॉझिटिव्ह

नागरिकांची सतर्कता

करोनाच्या पार्श्‍वभूमीवर देशभरात संचारबंदी लागू करण्यात आली आहे. असे असतानाही येथील मंगलमूर्ती चित्रमंदिर परिसरात रुग्णवाहिकेतून काहीजण तेलंगणा राज्यातून आल्याची माहिती स्थानिक नागरिकांना मिळाली. त्यांनी याबाबतची माहिती व पालिका व पोलिस प्रशासनाला दिली. चौकशी केली असता पारसमल राजपुरोहित व मोहनसिंग राजपुरोहित हे दोघेजण पहाटेच्या सुमारास रुग्णवाहिकेमधून आल्याची माहिती मिळाली.

हेही वाचा-रिक्षाला मीटर डाऊन ची प्रतीक्षा

अंधाऱ्यां रात्री ते दोघे दाखल

गुरुवारी दुपारच्या सुमारास तेलंगणा राज्यातील वारंगल येथून निघाले होते. शुक्रवारी पहाटेच्या सुमारास ते येथील मंगलमूर्ती टॉकीजजवळ नातेवाईकांकडे आले. गावभाग पोलिस व पालिका आरोग्य विभागाच्या पथकाकडून या दोघांना ताब्यात घेण्यात आले. प्रथम गावभागातील आरोग्य केंद्रात त्यांची तपासणी करण्यात आली. याबाबतची माहिती समजल्यानंतर प्रांताधिकारी डॉ. विकास खरात यांनी तातडीने दोघांची इंदिरा गांधी सामान्य रुग्णालयात तपासणी करुन त्यांचे स्वॅब तपासणीसाठी घेण्याच्या सुचना केल्या.यावेळी पोलिस उपअधिक्षक गणेश बिरादार उपस्थित होते. तपासणीनंतर मोहनसिंग व पारसमल राजपुरोहित यांना विलगीकरण केंद्रात पाठविण्यात आले आहे.

हेही वाचा-सिंधुदुर्गात आरोग्य यंत्रणेची अशीही दक्षता...

 दोघा राजपुरोहितांना आणणारा रुग्णवाहिका चालक मात्र वाहनासह निघून गेला. गावभाग पोलिसांनी त्या चालकासह दोन्ही राजपुरोहितांवर गुन्हा दाखल केला आहे. या प्रकाराने पोलिस प्रशासन यंत्रणा हडबडून गेली आहे. तपासणी नाक्यावर प्रत्येक वाहनाची सतर्कतेने तपासणी करावी, अशा सक्त सूचना मुख्याधिकारी दीपक पाटील यांनी कर्मचाऱ्यांना केल्या.