इचलकरंजी : कोरोना निर्बंधांचं उल्लंघन करत गणेश मंडळासमोर गर्दी जमवल्याप्रकरणी येथील झेंडा चौक मंडळावर पोलिसांनी कारवाई केली. यात नगरसेवकासह आठ जणांवर गावभाग पोलिसांत गुन्हा दाखल केला. अजित महादेव जाधव, नगरसेवक अमरजित राजाराम जाधव, अर्थव उरुणकर, योगेश पवार, संकेत कांबळे, संकेत डंबे, निलेश जाधव, गौरव जाधव (सर्व झेंडा चौक) अशी त्यांची नावे आहेत. मंडळाने एलईडी लाईट, फोकस, लेसर शो पाहण्यासाठी मंगळवारी (ता. १४) रात्री नागरिकांची प्रचंड गर्दी जमली होती.

पोलिसांतून मिळालेली माहिती अशी, झेंडा चौक मंडळ गणेशोत्सवात आकर्षक गणेश मूर्ती, देखावा सादर करते. यावर्षीही वेगळपण कायम ठेवत समुद्रमंथन रुपात गणेश मूर्तीची प्रतिष्ठापना केली आहे. त्याच्या उद्‍घाटनावेळी मंडळाने १४ सप्टेंबरला मंडपासमोर एलईडी लाईट, फोकस, लेसर शो सादर केला. शासनाने घातलेल्या निर्बंधांचे उल्लंघन करत नागरिकांची गर्दी जमली. या प्रकरणी मंडळाच्या आठ जणांवर गुन्हा दाखल झाला आहे.

पहिलीच कारवाई

जिल्ह्यात यंदाच्या गणेशोत्सवात प्रथमच एका मंडळाने तुफान गर्दी जमवल्याचा गंभीर प्रकार समोर आला आहे. याची गंभीर दखल घेत पोलिसांनी नगरसेवकासह आठ जणांवर गुन्हा दाखल केला आहे.

व्हायरल अन... पोलिस जागे

मंडळाच्या उद्‍घाटनप्रसंगी राजवाडा चौक पोलिस बंदोबस्ताला होते. तरीदेखील मोठ्या प्रमाणात गर्दी जमवत उद्‍घाटन केले. रात्री पाहता पाहता उद्‍घाटनाचे व्हिडीओ सोशल मीडियावर झळकले. त्यानंतर पोलिसांनी जागे होऊन मंगळवारी रात्री उशिरा मंडळातील आठ जणांवर गुन्हा दाखल केला.