कोल्हापूर - सरकारने वीज बिल माफी केली नाही तर आम आदमी पक्षाचे कार्यकर्ते हिवाळी अधिवेशनामध्ये मुख्यमंत्री उद्धव ठाकरे यांच्या घरासमोर आंदोलन करतील, असा इशारा आम आदमी पक्षाचे प्रदेशाध्यक्ष रंगा राचुरे यांनी आज पत्रकार परिषदेत दिला. पदवीधर आणि महापालिका निवडणुकीत पक्ष चांगली कामगिरी करेल. असा आशावाद त्यांनी यावेळी व्यक्त केला. 

रंगा राचुरे म्हणाले, ‘वीज बिल माफ करण्याचे आश्‍वासन दिले होते. मात्र ते अद्याप पूर्ण केलेले नाही. हिवाळी आधिवेशनापर्यंत वीज बिल माफीचा निर्णय झाला नाही तर आप कार्यकर्ते मुख्यमंत्र्यांच्या घरासमोर निदर्शने करतील. मात्र वीज बिल माफीचा निर्णय घेण्यास सरकारला भाग पाडू.’’ असे सांगून ते म्हणाले ‘‘प्रस्थापीत पक्षांचा फोलपणा लक्षात आल्याने आम आदमी पक्षाकडे समाजा अपेक्षेने पाहत आहे. त्यामुळे पदवीधर मतसंघाची निवडणूक लढवण्याचा निर्णय पक्षाने घेतला. पुणे पदवीधर मतदारसंघातून डॉ.अमोल पवार उमेदवार आहेत. त्याचबरोबर कोल्हापूर महापालिकेची निवडणूकही पक्ष पूर्ण ताकदीने लढवणार आहे. नुकताच महापालिकेवर पक्षाने मोर्चा काढला होता. त्याना जनतेचा चांगला प्रतिसाद मिळाला. शासनाने अंबाबाई मंदिरात पगारी पुजारी नेमण्याचा कायदा केला पण अद्याप अंमलबजावणी नाही. कायदा त्वरीत लागू करावा.’   यावेळी पश्‍चिम महाराष्ट्र अध्यक्ष संदीप देसाई, जिल्हाध्यक्ष निलेश रेडेकर, युवाध्यक्ष उत्तम पाटील, संतोष घाटगे, नीलेश रेळेकर, सूरज सुर्वे, नारायण पवार यांच्यास कार्यकर्ते उपस्थित होते.

हे पण वाचा - शाळा सुरू करण्यातील संभ्रम कायम ; शिक्षकांच्या स्वॅब टेस्टसाठी मुदतवाढ

ऑडिटरसाठी आंदोलन
महापालिकेने पाच वर्षाच्या कारभाराचे ऑडिट करण्यासाठी ऑडिटर नेमावा यासाठी आपने आंदोलन केले. ऑडिटर नेमण्यासाठी पंधरा दिवसांची मुदत दिली होती. ती दोन दिवसात संपणार आहे. त्यानंतर पक्षाच्यावतीने तीव्र आंदोलन करण्यात येईल. असे संदीप देसाई यांनी सांगितले.

संपादन - धनाजी सुर्वे