कोल्हापूर : करवीर निवासिनी श्री अंबाबाईच्या खजिन्यात आता आणखी 64 लाखांच्या सोन्याच्या दागिण्यांचा समावेश झाला आहे. एप्रिल 2019 ते 31 मार्च 2020 पर्यंत देवीला अर्पण झालेल्या दागिण्यांच्या मुल्यांकनाची प्रक्रिया पूर्ण झाली असून एकूण एक हजार 909 ग्रॅम वजनाच्या सोन्याच्या दागिण्यांचा त्यात समावेश आहे. 

दरम्यान, मंदिरातील गरूड मंडपात दागिने मुल्यांकनाची प्रक्रिया पूर्ण झाली. सीसीटीव्ही कॅमेऱ्याखाली व मुंबईचे प्रसिध्द सराफ व्यावसायिक पुरूषोत्तम काळे यांच्या मार्गदर्शनाखाली अत्यंत पारदर्शकपणे देवस्थान समितीने ही प्रक्रिया पूर्ण केली असल्याचे समितीचे अध्यक्ष महेश जाधव, सचिव विजय पोवार यांनी सांगितले. एका वर्षात श्री अंबाबाईला अठरा हजार 229 ग्रॅमचे चांदीचे दागिणे भाविकांनी अर्पण केले असून त्याची किंमत सात लाख वीस हजार पंचावन्न इतकी आहे. 

हेही वाचा - कोल्हापुरात आरक्षणाचा फटका ‘भाजप-ताराराणी’ला ; काँग्रेसचे प्रभाग मात्र सुरक्षित -

दख्खनचा राजा जोतिबाला 276 ग्रॅमचे नऊ लाख वीस हजार किमतीचे सोन्याचे तर सात हजार 752 ग्रॅम वजनाचे दोन लाख 85 हजार 782 किंमतीचे सोन्याचे दागिणे भाविकांनी अर्पण केले आहेत. दरम्यान, सोन्याचा प्रति दहा ग्रॅम दर 33 हजार तीनशे तर चांदीचा प्रति किलो दर 39 हजार पाचशे रूपये या प्रमाणे मुल्यांकन झाले आहे. समितीच्या खजानीस वैशाली क्षीरसागर, सदस्य शिवाजीराव जाधव, राजेंद्र जाधव, चारूदत्त देसाई, राजाराम गरूड आदींच्या उपस्थितीत ही प्रक्रिया पूर्ण झाली. 

संपादन - स्नेहल कदम