_{गारगोटी (जि. कोल्हापूर) : भुदरगड तालुक्यातील रांगणा किल्ला येथे दारू पिल्याच्या कारणावरून मोबाइल स्टंटबाजीसाठी करत तरूणाला मारहाण करणार्‍या चौघांना नागरिकांनी चोप देऊन पोलिसांच्या ताब्यात दिले. याप्रकरणी चौघांवर गुन्हा दाखल झाला असून  पोलिसांनी त्यांना अटक केली. ॠषिकेश भरत माने, प्रसाद शिवाजी माने (दोघे कोगनोळी), उमेश राजाराम माने (रा. वडणगे), विजय नामदेव गुरव (रा. शिरगाव, करवीर) अशी त्यांची नावे आहेत.} 

_{२६ जानेवारीला रांगणा किल्ला येथे फिरण्यासाठी गेलेल्या गारगोटीतील एका युवकाला दारू पिल्याच्या कारणावरून माफी मागण्यास सांगून जमिनीवर नाक घासावयास लावले. तसेच माफी मागावयास सांगून खाली वाकल्यानंतर त्या युवकाला लाथाबुक्यांनी व झाडाच्या फांदीने बेदम मारहाण केली. यावेळी त्याच्या डाव्या हाताला व डोक्याला गंभीर दुखापत झाली. त्यांनी या मारहाणीचे मोबाईलवर शुटींग करून व्हायरल करून स्टंटबाजी केली. युवकास केलेल्या मारहाणीची माहिती समजताच संतप्त झालेल्या तरूणांनी मारहाण करणार्‍या चौघांची वाट पहात बसले होते. मारहाण करणारे हे चार जण मंगळवारी रात्री आपल्या गावी परतत असताना त्यांना वाटेत अडवून संतप्त जमावाने बेदम चोप दिला आणि पोलिसांच्या ताब्यात दिले. त्यांच्यावर कडक कारवाई करण्याची मागणी केली.}

_{हे पण वाचा - नादच खुळा! कोल्हापूरच्या साबळेवाडीतील पती-पत्नीने घडविला इतिहास, संपूर्ण गावात होतेय चर्चा
                 
संपादन - धनाजी सुर्वे}