निपाणी : सार्वजनिक गणेशोत्सव मंडळांना मूर्ती प्रतिष्ठापनेसाठी दरवर्षी येथील नगरपालिका, पोलिस व वीज खात्याकडून परवाना दिला जात होता. मात्र यंदा कोरोना (Corona) संसर्गाच्या पार्श्वभूमीवर शासनाने सार्वजनिक ठिकाणी मंडप उभारून मूर्ती प्रतिष्ठापनेला निर्बंध आणले आहेत. त्यामुळे यंदा मंडळांना प्रशासनाकडून मिळणार की नाही? याबद्दल संभ्रम निर्माण झाला आहे. प्रशासनालाही याबद्दल स्पष्ट आदेश नाहीत, मात्र सोमवार (ता. ३०) नंतर परवान्याबद्दल पुढील कार्यवाही होईल, असे प्रशासनाकडून सांगितले जात आहे.

शहर परिसरात दरवर्षी जवळपास पाचशेहून अधिक सार्वजनिक गणेश मूर्तींची प्रतिष्ठापना होते. मूर्ती प्रतिष्ठापनेपूर्वी सर्व गणेशोत्सव मंडळाच्या पदाधिकाऱयांना प्रशासनाकडून रितसर परवाना घेण्याची सक्ती केली जाते. त्यानुसार मंडळांकडून अर्ज केल्यावर पालिका, पोलिस व वीज खात्याकडून परवाना दिला जात असे. यंदा मात्र आठ-दहा दिवसावर गणेशोत्सव आला तरी प्रशासनाला परवाना देण्याबद्दल खात्याकडून आदेश नाहीत. दुसरीकडे गणेशोत्साववर आणलेल्या निर्बंधाला सार्वजनिक गणेशोत्सव मंडळाला विरोध होत आहे. केवळ मंदिरात गणेश मूर्तींची प्रतिष्ठापना करण्याचे प्रशासकीय आदेश आहेत. शिवाय मिरवणूक काढण्यास बंदी आहे.

मात्र दरवर्षीच्या ठिकाणी मंडप उभारून साधेपणाने गणेशोत्सव साजरा करण्यास मुभा देण्याची मागणी मंडळाच्या कार्यकर्त्यांची आहे. प्रशासन मुभा देत नसल्याने मंडळाचे कार्यकर्ते संतप्त बनले आहेत. दरवर्षी उत्सवाच्या पार्श्वभूमीवर पंधरा दिवस अगोदर मंडळांना परवाना देण्यासाठी पालिका, पोलिस व वीज खात्याकडून अर्ज घेतले जात होते. यावेळी मात्र प्रशासनाकडून कोणत्याही हालचाली नाहीत.

पालिका अधिकाऱयांना विचारल्यावर त्यांनी सोमवारी (ता. ३०) तारखेला शासन पातळीवर याबद्दल चर्चा होणार असून त्यानंतर काय निर्देश काय येतात? पहावे लागणार असल्याचे सांगितले. मात्र तरूण कार्यकर्ते उत्सव साजरा करण्यावर ठाम आहेत. गणेशोत्सव नाही तर मतदानही नाही, असा इशारा येथील श्री. गणेशोत्सव महामंडळाने दिला आहे.

यंदा केवळ मंदिरात मूर्तीची प्रतिष्ठापना होईल. सार्वजनिक ठिकाणी मंडप उभारून गणेशोत्सव साजरा करण्याबद्दल आदेश नाहीत. तरीही सोमवारी (ता. ३०) वरिष्ठ पातळीवर यावर चर्चा करून निर्णय होण्याची शक्यता वर्तवली जात आहे.

- जगदीश हुलगेज्जी, आयुक्त, निपाणी नगरपालिका