कोल्हापूर : महापालिकेच्या केएमटी उपक्रमाकडील अनेक बसेस देखभाल आणि दुरुस्तीअभावी बंद असल्याच्या प्रकारावर ‘सकाळ’मधून प्रकाश टाकल्यानंतर बंद बसेसपैकी आणखी पंधरा बसेसची दुरुस्ती झाली असून, त्‍या रस्त्यावर धावत आहेत. त्यामुळे रस्त्यावर धावणाऱ्या बसेसची संख्या ३१ वरून ४६ झाली आहे. टप्‍प्याटप्‍प्याने का होईना आता केएमटीत सुधारणा होत आहे. यामुळे बुडत्याला काडीचा आधार या म्हणीप्रमाणे केएमटीला आधार मिळाला आहे.

आर्थिक संकटातील केएमटीला लॉकडाउनमध्ये मोठ्या संकटाचा सामना करावा लागला तरी लॉकडाउन संपल्यानंतर आता झालेले नुकसान भरून काढण्याची वेळ आली आहे. असे असताना अनेक बसेस बंद पडणे आणि त्याकडे वरिष्ठ अधिकाऱ्यांचे लक्ष नसणे हेच एक प्रमुख कारण बसेस बंद पाडणे मागचे असल्याचे बोलले जात आहे. सध्या केवळ तीस ते बत्तीस बसेस धावत होत्या. प्रवासी मुबलक असले तरी बसचे वेळापत्रक कोलमडले आहे. फायद्याच्या मार्गावर दर अर्ध्या तासाने बस सेवा अपेक्षित आहे. पण, तिथे एक ते दीड तासाच्या अंतराने बस जात आहे.

सध्या बाजारात डिझेल ९४ रुपये आहे. एका बसला दररोज किमान ६० लिटर डिझेल लागते. पण, सध्या केएमटीचे तिकीट दर पहिला टप्पा दहा रुपये इतका आहे. त्यानंतर पुढच्या प्रत्येकी दोन किलोमीटर अंतराला दोन रुपये अशा पद्धतीने तिकीट आकारणी होते. सप्टेंबर २०१८ मध्ये दरवाढीची रचना झाली. त्याप्रमाणेच अजूनही तिकीट आकारणी सुरू आहे. त्यावेळी डिझेलचा भाव ७६ रुपये होता. आता भाव ९४ रुपये असतानाही त्याच दराने तिकीट आकारणी सुरू आहे. केएमटीचे तिकिटाचे दर निश्चित करण्यासाठी सर्व प्रक्रिया पूर्ण केल्यानंतर प्रादेशिक प्राधिकरणाची मंजुरी लागते. सर्व वस्तुस्थिती लक्षात आणून दिल्यानंतर प्राधिकरण तिकीट दरवाढीला मंजुरी देते. पण, केएमटी प्रशासन आणि मनपाकडून असा कोणताही प्रस्ताव अद्याप तयार केला नसल्याने जुन्याच तिकीट दराची अंमलबजावणी सुरू ठेवून आतबट्ट्यातला व्यवहार केला जात आहे.

हे तातडीने करणे आवश्‍यक

• आणखी बसेसची दुरुस्ती आवश्‍यक

• तिकीट दराबाबत तातडीने प्रस्ताव द्यावा

• फायद्याच्या मार्गावर जादा बसेसची गरज

• वरिष्ठ अधिकाऱ्यांनी जबाबदारी घेण्याची आवश्‍यकता

• प्रशासकांच्‍या कारवाईच्‍या भूमिकेनंतर दुरुस्ती

नादुरुस्त बसेसच्या दुरुस्तीसाठी प्रशासक डॉ. कादंबरी बलकवडे यांनी निधीची तरतूद केली असूनही त्याकडे लक्ष दिले नसल्याने बसेस दुरुस्त व्हायला वेळ लागला होता. याबाबतत प्रशासकांनी कारवाईची भूमिका घेतल्यानंतर बसेस दुरुस्ती होऊन रस्त्यावर धावत आहेत.