कोल्हापूर : आता महापूर नित्याचाच झाला आहे. पावसाळा आला की, पहिल्यांदा मनाची तयारी करतो. पाणी वाढले की, प्रापंचिक साहित्याची बांधाबांध करायची आणि घराजवळ पाणी आले की, लगेच चित्रदुर्ग मठात स्थलांतरित व्हायचे. हे आता ठरलेलेच आहे; पण आजही पावसाळ्यात रात्र झाली की, काळजाचा ठोका चुकतो. ही भावना सुतारमळा येथील नागरिक बोलून दाखवतात. सध्या त्यांनी युद्धपातळीवर प्रापंचिक साहित्याची बांधाबांध करायला सुरुवात केली आहे. एकूणच नदीकाठी असणाऱ्या सर्वच वसाहतींमध्ये घबराटीचे वातावरण असून, पाणी वाढल्यास त्यांनी स्थलांतर करण्याची तयारी ठेवली आहे.

शहरातील सुतारमळा, सीता कॉलनी, शाहूपुरी, मुक्त सैनिक वसाहत, कसबा बावडा, कदमवाडी, जाधववाडी, पाटोळेवाडी, बापट कॅम्प या भागांत महापुराचे पाणी येते. काही ठिकाणी नदीचे, तर काही भागांत स्थानिक ओढ्यांचे पाणी शिरते. त्यामुळे येथील नागरिकांनी आताच प्रापंचिक साहित्याची बांधाबांध करण्यास सुरुवात केली आहे. प्रशासनाचे अधिकारी रोज सकाळी आणि सायंकाळी येऊन पाहणी करतात. पाणी कुठपर्यंत आले की, घर सोडायचे याचे त्यांचे ठोकताळे ठरलेले आहेत. त्यामुळे या सर्व भागांतील नागरिक स्थलांतर करण्याच्या तयारीत आहेत. यातील बहुतांशी नागरिकांची व्यवस्था मुस्लिम बोर्डिंग, चित्रदुर्ग मठ, शाहू सांस्कृतिक भवन, मुक्त सैनिक वसाहतीमधील दोन शाळा येथे केली आहे.

दरम्यान, शहरामध्ये पावसाची उघडझाप सुरू होती. सकाळी पावसाच्या जोरदार सरी बरसल्या. दुपारी पावसाने दमदार फलंदाजी केली. सायंकाळी ५ नंतर पावसाने काही काळ विश्रांती घेतली; मात्र धरण क्षेत्रात पावसाची संततधार सुरू असल्याने नदीची पाणी पातळी सातत्याने वाढत आहे. शुक्रवार पेठेतील नदी घाटाच्या रस्त्यालगत पाणी आले आहे, तर अंत्यविधी करण्यात येणाऱ्या घाटावरही पाणी आले आहे. सुतारमळ्याच्या मागील बाजूस पाणी आले आहे. या सर्व भागांत प्रशासनाने नागरिकांना सतर्क राहण्याचे आदेश दिले असून, सूचना मिळाल्यानंतर तत्काळ स्थलांतर करावे, असेही सांगितले आहे.

महापुराची भीती प्रत्येक पावसाळ्यात असते. त्यामुळे आम्ही तयारीत राहतो. गेल्या दोन दिवसांपासून सर्व प्रापंचिक साहित्य सुरक्षित ठेवले आहे. प्रशासनाने सतर्कतेचा इशारा दिला असून, पाण्याची पातळी वाढली की, तातडीने आम्ही स्थलांतरित होणार आहोत.

- अमित लोहार, नागरिक, सुतारमळा