कोल्हापूर : कोणत्याही स्थितीत नोव्हेंबरअखेर लशीच्या पहिल्या डोसचे शंभर टक्के लक्ष्य पूर्ण करा, अशी सूचना पालकमंत्री सतेज पाटील यांनी आज केली. शासकीय विश्रामधाम येथे कोविड लसीकरण प्रोत्साहन योजनेतंर्गत सामाजिक संस्थांच्या बैठकीत ते बोलत होते. राजर्षी शाहू सभागृहात बैठक झाली. जिल्हाधिकारी राहुल रेखावार, जि. प. मुख्य कार्यकारी अधिकारी संजयसिंह चव्हाण, जिल्हा आरोग्याधिकारी डॉ. योगेश साळे आदी उपस्थित होते.

पालकमंत्री पाटील म्हणाले, ‘‘कोविडची तिसरी लाट थोपविण्यासाठी जनतेचे लसीकरण आवश्‍यक आहे. जनतेने दोन्ही डोस पूर्ण करण्याकडे कटाक्षाने लक्ष द्यावे, ज्यांचा पहिला डोस पूर्ण झाला आहे त्यांनी दुसरा डोस घ्यावा, ज्यांचे लसीकरण अपूर्ण आहे त्यांनी ते पूर्ण करावे, लसीकरण पूर्ण करण्यासाठी आरोग्य यंत्रणेबरोबर सामाजिक संस्थांनाही पुढाकार घ्यावा, अनाथ, फिरस्ती यांच्याकडे आधारकार्ड नसेल अथवा कागदपत्रे नसतील अशा लोकांचे लसीकरण करावे.’’

सोमवारी (ता. ८) सकाळी दहा वाजता जिल्ह्यातील तालुक्याच्या ठिकाणी संबंधित तहसिलदार, गटविकास अधिकारी अपूर्ण लसीकरणाबाबत स्वयंसेवी संस्था तसेच संबंधितासोबत आढावा घ्यावा,त्या गावचे शंभर टक्के लसीकरण पूर्ण करावे, असे आवाहन सतेज पाटील यांनी केले. सोमवारी तहसीलदार व बीडोओच्या आढावा बैठकीत जे लोक लसीकरणापासून वंचित आहेत त्यांच्यासाठी स्वयंसेवी संस्थांच्या कार्यकर्त्यांनी पुढाकार घ्यावा, कामाबाबत गावनिहाय कार्यकर्त्यांची यादी तयार करावी अशी सूचना जिल्हाधिकारी रेखावार यांनी केली.

आरोग्याधिकारी साळे यांनी लसीकरणाच्या आढाव्याचे सादरीकरण केले. पालकमंत्री तसेच स्वयंसेवी संस्थांच्या पदाधिकाऱ्यांच्या सूचनेनुसार लसीकरणाचा वेग वाढविण्याची ग्वाही दिली. जिल्ह्यात ८४ टक्के लोकांनी पहिला, तर ४१ टक्के लोकांनी दूसरा डोस घेतला आहे. जिल्ह्यातील १४५ गावांतील अठरा वर्षावरील नागरिकांचे शंभर टक्के लसीकरण झाल्याचे माहिती मुख्य कार्यकारी अधिकारी संजयसिंह चव्हाण यांनी दिली.