राधानगरी : आज सकाळी साडेदहा पर्यंत राधानगरी धरणाच्या (Radhanagari Dam) स्वयंचलित सात दरवाज्या पैकी चार दरवाजे खुले झाले आहेत. यातून वीज निर्मितीसाठी 7100 क्यूसेक पाण्याचा विसर्ग भोगावती नदीपात्रात सध्या सुरू झाला आहे.

पावसाचा जोर कायम असून पाणी पातळी वाढल्यास आणखी दरवाजे खुले होण्याची शक्यता आहे. कालपासून या धरणाच्या स्वयंचलित दरवाजाबाबत सोशल मीडियावरून अफवांचे पेव फुटले होते.

इंचा इंचाने पाणी वाढत असतानाच आधीच पंचगंगा आणि भोगावती नदीला आलेल्या पुराची तीव्रता आणखीन वाढण्याची भीती लोकांमध्ये जागृत झाली होती. दुसरीकडे हे धरण भरलेच पाहिजे हेही मत असताना आज रात्री केव्हाही स्वयंचलित दरवाजे खुले होतील, असा लोकांचा अंदाज होता.

मात्र, आज सकाळी आठ वाजता स्वयंचलित दरवाजांनी हा मुहूर्त साधला. वाऱ्याचा प्रचंड दाब असल्याने क्षमतेपूर्वीच सात पैकी सहा क्रमांकचा दरवाजा खुला झाला. त्यानंतर दोन तासात आणखी तीन दरवाजे खुले झाले. सध्या तीन ते सहा असे सलग दरवाजे खुले आहेत. यामुळे भोगावतीच्या पुरात आणखीन भर पडणार असून परिणामी उद्यापासून पंचगंगेची पाणी पातळी ही वाढण्याची शक्यता आहे.