इचलकरंजी - भररस्त्यात चारित्र्याच्या संशयावरून पतीने पत्नीवर कोयत्याने हल्ला केला. या हल्ल्यात हातापायावर गंभीर वार झाल्याने पत्नी जखमी झाली. याप्रकरणी सचिन शिवाजी मोरबाळे (वय ३८, रा. कृष्णा नगर) याच्यावर शिवाजीनगर पोलिस ठाण्यात गुन्हा दाखल झाला आहे. याबाबतची फिर्याद जखमी गौरी सचिन मोरबाळे (वय २५, रा. नमाजगे माळ) यांनी पोलिसांत दिली आहे. ही घटना येथील भगतसिंग गार्डन मार्गावर घडली.

याबाबत घटनास्थळ व पोलिसांतून मिळालेली माहिती अशी, फिर्यादी गौरी मोरबाळे व संशयित सचिन मोरबाळे हे दोघे पती पत्नी आहेत. दोघेही येथील भगतसिंग गार्डन येथून पायी चालत जात असताना चारित्र्याच्या संशयातून दोघांमध्ये वाद सुरू झाला. यावेळी पती सचिन याने हातातील पिशवीतून कोयता बाहेर काढला.

कोयत्याने पत्नी गौरीच्या दोन्ही पायावर टोचेने मारहाण केली. आणखी वार करत असताना गौरी यांनी अडवण्याचा प्रयत्न केला. यावेळी त्यांच्या उजव्या हाताच्या करंगळीवर मारहाण झाली. त्याने शिवीगाळ करत जिवे मारण्याची धमकी दिली. याप्रकरणी जखमी गौरी यांच्या फिर्यादीनुसार पती सचिन याच्यावर गुन्हा दाखल केला आहे.