कोल्हापूर - सध्या उपलब्ध असणारी इंधने भविष्यात संपुष्टात येऊ शकतात. त्यासाठी पर्यायी इंधन उपलब्ध करून देणे आवश्‍यक आहे. याबाबत जगभरात संशोधने केली जात आहेत. यात कोल्हापुरातील शुक्रवार पेठेतील एक तरुण आघाडीवर आहे. भाताचा कोंडा व उसाच्या चिपाडापासून बायोमिथेन, बायोइथेनॉल आणि बायोडिझेलची निर्मिती त्यांनी केली असून त्यांच्या या संशोधनामुळे भविष्यात इंधनाला जैविक पर्याय उपलब्ध झाला आहे. तसेच हे इंधन कमी खर्चात तयार करता येणार असून पुन्हा पुन्हा वापरण्यासाठी सोयीस्कर ठरणार आहे. यामध्ये संशोधन करणाऱ्याचे नाव आहे डॉ. सचिन विजय ओतारी.

डॉ. सचिन ओतारी यांचे पदवीचे शिक्षण राजाराम महाविद्यालयातून सुक्ष्मजीवशास्त्र या विषयातून झाले. पुढे शिवाजी विद्यापीठातून पदव्युत्तर शिक्षण घेतले. डॉ. डी. वाय. पाटील अभिमत विद्यापीठात त्यांनी ‘बायोलॉजिकल सिथेंसिस ऑफ सिल्वर नॅनो पार्टिकल फॉर बायोमेडिकल ॲपलिकेशन’ या विषयावर पीएच.डी. संपादन केली. त्यानंतर त्यांना साऊथ कोरियातील काँकुक विद्यापीठात ब्रेनपुल फेलोशिप मिळाली. या फेलोशिपच्या माध्यमातून बायोइंधन निर्मितीबाबत संशोधन करण्याची संधी मिळाली. तेथे त्यांनी रिसर्च असिस्टंट प्रोफेसर म्हणून काम केले. या विषयावर त्यांचे ४३ शोधनिबंध प्रकाशित झाले आहेत. नुकतेच त्यांना महाराष्ट्र ॲकॅडमी ऑफ सायन्स या संस्थेकडून यंग असोसिएटस म्हणून नामांकनही मिळाले होते. तसेच राष्ट्रीय स्तरावरील असोसिएशन ऑफ मायक्रोबायॉलॉजी या संस्थेकडून डॉ. जे. एस. भाट पुरस्काराने गौरविण्यात आले आहे. तसेच त्यांना ३ कोरियन पेटंटही मिळाली आहेत.

हे पण वाचा -  अजबच ! मुलं वर्गात, शिक्षक घरात; काय आहे नेमका प्रकार वाचा !

हायड्रोजलची निर्मिती 
साऊथ कोरियामधून परत आल्यानंतर डॉ. ओतारी यांना विद्यापीठ अनुदान आयोगाची डॉ. डी. एस. कोठारी पोस्ट डॉक्‍टरल फेलोशीप मिळाली. सध्या ते शिवाजी विद्यापीठात हळदीतील करकुमीन या घटकांपासून काळ्या पडणाऱ्या त्वचेवर परिणामकारक अशा नॅनो पार्टिकल बेस्ड हायड्रोजलची निर्मिती करत आहेत.

संपादन - धनाजी सुर्वे