कोल्हापूर: उपचारापेक्षा रुग्णालयात दाखल झाल्यानंतर बिल किती होईल?, याची भीती वाटते. सरकारी दवाखान्यात उपचार करावेत की?, खासगीत करावेत? असा प्रश्न निर्माण होतो. अशांना उपचार खर्चाचा भार उचलत बिनधास्तपणे उपचार घेण्याची सुविधा आयुष्यमान भारत प्रधानमंत्री जनआरोग्य योजनेने दिली. जिल्ह्यात तीन वर्षांत २ लाख लोकांनी २५ कोटींच्या खर्चाचे उपचार घेतले आहेत.

आयुष्यमान भारत प्रधानमंत्री योजना सुरू होऊन गुरुवार (ता. २३) सप्टेंबरला तीन वर्षे पूर्ण होतात. राज्य शासनातर्फे महात्मा फुले जनआरोग्य योजना चालवली जाते. त्यासाठी प्रत्येक जिल्ह्यात कार्यालय आहे, तेथेच प्रधानमंत्री आरोग्य योजनेचेही काम चालते. जनगणनेनुसार ग्रामीण भागातील कुटुंबांच्या नोंदी घेतल्या.

यात घराची भौगोलिक स्थिती, कुटुंबातील कमावती व्यक्ती, अनुसूचित जाती जमाती, भूमिहीन शेतकरी आदी वर्गातील कुटुंबे, तर कचरा वेचक व्यक्ती, फिरस्ते, घरकाम करणारे, फेरीवाले, बांधकाम मजूर, कारागिर अशा ११ वर्गांतील कुटुंबे यांच्यासह एकूण ८३ लाख कुटुंबांचा प्रधानमंत्री जनआरोग्य योजनेत समावेश केला आहे. या वर्गातील व्यक्तींना दीड लाखांपासून ५ लाखांपर्यंतच्या उपचार खर्चाची सेवा राज्य आरोग्य हमी सोसायटीकडून दिली जाते. त्यासाठी ११२२ आजारांवरील उपचार घेता येतात.

जिल्ह्यातील ५२ रुग्णालयांत सेवा

जिल्ह्यातील एकूण ५२ रुग्णालयांत सेवा आहे. यात १२ शासकीय रुग्णालयांचा समावेश आहे. रुग्णांनी योजनेसाठी योग्य ती कागदपत्रे सादर केल्यानंतर रुग्ण दाखल झाल्यापासून ते डिस्चार्ज होईपर्यंतचा खर्च केला गेला. ज्या रुग्णालयात उपचार झाले. त्याचे बिल संबंधित रुग्णालयाला योजनेद्वारे आदा केले. ज्यांच्याकडे पिवळे, अंत्योदय, केसरी, रेशन कार्ड आहे, अशांना त्याचा लाभ घेता येतो.

"प्रधानमंत्री जनआरोग्य योजनेचा लाभ गरजूपर्यंत पोहचविण्यात यश आले आहे. २०१८ पासून आजवर २ लाख ४ हजार ३४८ व्यक्तींनी योजनेचा लाभ घेतला आहे. या योजनेसाठी जिल्ह्यात ७ लाख २६ हजार कुटुंबांचा समावेश आहे. त्यापैकी २ लाख १८ हजार ९६७ व्यक्तींनी ई कार्ड काढली आहेत. अशांना त्याचा लाभ घेता येतो."- डॉ. सुभाष नांगरे, जिल्हा समन्वयक जनआरोग्य योजना