कोल्हापूर - येथील चित्रनगरी परिसरातील ओसाड माळरानावर तीन दिवस अन्न-पाण्यावाचून तळमळून बेशुद्ध पडलेल्या एका तीसवर्षीय तरुणीचे आज व्हाईट आर्मीच्या जवानांनी पुनर्वसन केले. तिच्यावर योग्य औषधोपचार करून शेठ रूईया विद्यालयात दाखल केले असून, ही तरुणी कुणाच्या ओळखीची असेल तर व्हाईट आर्मी किंवा सागर बगाडे यांच्याशी संपर्क साधावा, असे आवाहन करण्यात आले आहे.

आज सकाळी मॉर्निंग वॉकला गेलेल्या चंदन मिरजकर यांना या परिसरात एक तरूणी बेशुद्ध पडलेली दिसली. त्यांनी तत्काळ याबाबतची माहिती सागर बगाडे यांना फोनवरून कळवली. श्री. बगाडे यांनी याबाबत तत्काळ व्हाईट आर्मीशी संपर्क साधला आणि त्यांच्यासह व्हाईट आर्मीची रेस्क्‍यू टीम चित्रनगरी परिसरात पोचली. 

दरम्यान, पोलीसही येथे आले आणि संबंधित तरूणीची सर्व स्वच्छता करून औषधोपचारही केले. 

हे पण वाचा -  ...त्यामुळे कोल्हापूर प्रशासन हडबडले; काय आहे कारण?

 या तरुणीच्या अंगात जीन्स व टी शर्ट असून केस व्यवस्थित कट केलेले आहेत. सुशिक्षित वाटणाऱ्या या तरुणीवर कोणता तरी मानसिक आघात झाला असावा. तिच्या असंबद्ध बोलण्यावरून तिची काहीच माहिती मिळत नाही. मात्र, तरीही या तरूणीची जबाबदारी या सर्व मंडळींनी घेतली असून तिचे पुनर्वसन करण्याचा निर्णय घेतला आहे.

संपादन - धनाजी सुर्वे