कोल्हापूर : गगनबावडा, राधानगरी, पन्हाळा-शाहूवाडी तालुक्‍यांतून येणारा रानमेवा यंदा डोंगरातच अडकला आहे. जांभळे, करवंदे, कच्च्या कैऱ्या, बोरं, आवळा, चिंच टोपलीत घेऊन येणाऱ्या महिला संचारबंदीमुळे गावातच अडकून राहिल्या आहेत. त्यांची आर्थिक कमाई बंद असल्याने त्यांच्यात अस्वस्थतेचा सूर आहे. 

जिल्ह्याच्या पश्‍चिम भागातील महिला जांभळे, करवंदे, कैऱ्या घेऊन दरवर्षी कोल्हापुरात येतात. बाबुजमाल दर्ग्यासमोरील जागेत त्यांच्याकडील रानमेव्याची दलालांकडून खरेदी होते. काही महिला थेट शहरात वणवण भटकत रानमेव्याची विक्री करतात. शहरातील रस्त्यांवर ठिकठिकाणी बसून विक्री करून पैशाची जमवाजमव करणाऱ्याही महिला आहेत. साधारणपणे एप्रिलमध्ये जंगलातील रानमेवा घेऊन त्यांची पावले शहराकडे वळतात. शहरालगत असणाऱ्या ग्रामीण भागातील रस्त्यांवर लहान मुले-मुली रानमेव्याच्या विक्रीत गुंतलेली असतात. सुटीचा आनंद घेत आर्थिक कमाई करण्याचे त्यांचे दिवस असतात. 

कोरोनामुळे रानमेव्याची आवकच शहरात झालेली नाही. महिनाभर संचारबंदी, त्यात पुन्हा तीन मेपर्यंत वाढलेल्या संचारबंदीच्या दिवसांमुळे त्यांची पंचाईत झाली आहे. तीन मेनंतर पुन्हा संचारबंदीचे दिवस वाढले तर यंदाचा हंगाम त्यांच्यासाठी निरंक राहण्याची चिन्हे आहेत. गगनबावड्याकडे शहरातून जाणाऱ्या फुलेवाडी नाका, कुंभी-कासारी कारखाना, कळे, साळवण, पळसंबे, तर करवीर तालुक्‍यातील पिरवाडी, वाशी, कांडगाव, देवाळे, हळदी, कोथळी, कुरुकली, परिते, भोगावती, राधानगरी तालुक्‍यातील घोटवडे, कौलव, सिरसे, आवळी, आणाजे, खिंडी व्हरवडे, गुडाळ, कसबा तारळे, पिरळ, फेजिवडे, राधानगरीसह पन्हाळा-शाहूवाडी तालुक्‍यांच्या रस्त्यांवर रानमेव्याच्या टोपल्या विक्रीसाठी येतात. यंदा हे चित्र पाहायला मिळत नाही. संचारबंदी उठल्यानंतरही ते पाहायला मिळण्याची शक्‍यताही धूसर आहे. 

लाखोंची उलाढाल थांबली 
करवंदे, जांभळे गोळा करण्यासाठी ग्रामीण भागातील विक्रेते दुपारी रानावनात भटकतात. चार तासांत दोघे जण 6 ते 7 किलो करवंदे, जांभळे टोपलीत जमा करतात. शहरातील दलालांना एक टोपली ते पाचशे ते सहाशे रुपयाला विकतात. अशा शेकडो टोपल्या शहर विक्रीला येतात. फणस व रायवळ आंबे यांची विक्री नगावर होते. या सर्वांची शहरात उलाढाल काही लाखांत होते, असे विक्रेत्यांतून सांगण्यात येते.