कोल्‍हापूर : जिल्‍ह्यात मोठ्या प्रमाणात खतांचे लिंकिंग सुरू आहे. युरिया खरेदी करताना शेतकऱ्यांच्या माथी अन्य दुय्‍यम दर्जाची खते मारली जात आहेत. युरियाच्या दुप्‍पट व तिप्‍पट किमतीची खते घेऊन करायचे काय, असा प्रश्‍‍न शेतकऱ्यां‍ना पडला आहे.

शेतकऱ्यां‍नी लिंकिंगचे खत खरेदी करायचे किंवा जादा दराने युरिया खरेदी करायचा, एवढाच काय तो पर्याय ठेवला आहे. मात्र, या सर्वांवर नियंत्रण ठेवणारा कृषी विभाग मात्र लोकांच्याच तक्रारीची वाट पाहत आहेत. त्यामुळे मात्र शेतकऱ्यां‍मधून संताप व्यक्‍त होत आहे.

खतांचे लिंकिंग हा प्रकार नवीन राहिलेला नाही. दरवर्षी कंपन्यांकडून पुरवठादारांना, विक्रेत्यांना व तेथून पुढे शेतकऱ्यां‍ना लिंकिंग खताचा पुरवठा केला जातो. यावर्षीही खतांचे लिंकिंग मोठ्या प्रमाणात सुरू आहे.

अपवाद वगळता सर्रास पुरवठादार लिंकिंग खतांचा पुरवठा करत आहेत. यातील बहुतांश खते न परवडणारी, उपयुक्‍त नसणारी आहेत. कोणत्याही प्रकारे पिकांना फायदा होत नसतानाही केवळ युरियासाठी ही खते खरेदी करण्याची वेळ शेतकऱ्यां‍वर आली आहे.

लिंकिंग खते घेतली नाही तर शेतकऱ्यांना युरिया दिला जात नाही. फक्‍त युरियाच घ्यायचा झाला तर तो मूळ किमतीच्या कितीतरी अधिक दराने खरेदी करावा लागतो. त्यामुळे शेतकऱ्यांची सध्या लूट सुरू आहे. एका बाजूला कृषी विभाग लिंकिंग करणाऱ्यां‍वर कारवाई करण्याची घोषणा करतो. मात्र, प्रत्यक्षात लिंकिंग करणाऱ्यांवर काहीच कारवाई होताना दिसत नाही.

सध्या भरणीची कामे सुरू आहेत. तसेच उन्‍हाळी पिकांची पेरणीही सुरू आहे. यासाठी आवश्यक युरिया घेण्यासाठी गेल्यास त्यासोबत नको असणारी खते दिली जातात. युरिया पोते २७० रुपये तर लिंकिंग खत १४०० रुपयांचे दिले जात आहे. युरियासाठी शेतकऱ्यांना अडवण्याची भूमिका घेतली जात आहे. कृषी विभागाने स्‍वत:हूनच दुकानांवर धाडी टाकून माहिती घ्यावी.

- आकाश पवार, शेतकरी, इस्‍पुर्ली

पुणे येथे आज आढावा बैठकीचे आयोजन केले होते. त्यामुळे खताच्या लिंकिंगबाबत तक्रार आली असेल तर माहिती घेण्यात येईल. तसेच अन्य कोणाला याबाबत काही तक्रारी असतील तर त्यांनी कृषी कार्यालयाशी संपर्क साधावा.

- दत्तात्रय दिवेकर, जिल्हा अधीक्षक कृषी अधिकारी