कोल्हापूर - कोरोनाच्या कठीण परिस्थितीतही पोलिस अधिकारी व कर्मचारी जीवाची पर्वा न करता आपले कर्तव्य प्रामाणिकपणे पार पाडत आहेत. अशा पोलिस कर्मचाऱ्यांचे मनोधैर्य वाढवणारी घटना आज पेठवडगाव येथे घडली. छोट्या मुलींनी स्वहस्ताक्षरात इंग्रजीत अभिनंदन पत्र लिहून पोलिस कर्मचाऱ्याला दिले. मनोधैर्य अशाही पद्धतीने वाढविले जाऊ शकते, हे दाखवून दिले.

पेठवडगाव येथील डॉ. बाबासाहेब आंबेडकर पुतळा येथे पोलिस कर्मचारी मिलिंद टेळी आणि सहकारी बंदोबस्ताचे कर्तव्य पार पाडत होते. दिवसभर ऊन-पावसाचा त्रास, वेळेवर जेवण नाही. तसेच विनाकारण निष्काळजीने फिरणाऱ्या नागरिकांना समजावून सांगणे सर्व सुरूच होते. हे सर्व करताना पोलिस कर्मचारी मानसिक आणि शारीरिक दृष्ट्या थकलेले असताना दोन चिमुकल्या मुलीं तेथे आल्या. त्यांनी तेली यांच्या हातात एक अभिनंदन पत्र दिले. ते पत्र नसून त्या चिमुकल्या मुलींनी स्वतःच्या हाताने लिहलेल्या मनातील भावना होत्या. अनुष्का जितेंद्र सणगर या शाळकरी मुलीने या भावना पोलिसांकडे अभिनंदन पत्राद्वारे व्यक्त केल्या आणि पोलिसही गहिवरले. चिमुकल्या मुलींच्या हातून असे भावनिक आणि मनोधैर्य वाढवणारे पत्र मिळाल्याने निश्‍चितपणाने अभिमान वाटला. कोरोनाविरूद्ध आपले कर्तव्य बजावण्याची हिम्मत आणखी वाढल्याची प्रतिक्रीया टेळी यांनी दिली.

हे पण वाचा -  कोल्हापुरातील वाढत्या कोरोनाच्या पार्श्वभूमीवर जिल्हाधिकाऱ्यांनी दिल्यात या महत्वाच्या सूचना

टू पोलिस अंकल...
टू पोलिस अंकल, फ्रॉम अनुष्का जितेंद्र सणगर असे लिहून तिने पत्रात ‘पोलिस’ या इंग्रजी शब्दाचा अर्थ पहिल्या ओळीतच मांडला आहे. ‘पब्लिक ऑफिस फॉर लिगल इन्व्हेस्टीगेशन ॲण्ड क्रिमिनल इमर्जन्सी’. याचबरोबर तिरंगा झेंडा फडकविल्याचे चित्र काढून तुम्ही या रंगांना, चक्राला आणि लोकांनाही सुरक्षा देत आहात, याचा अभिमान वाटत असल्याचे म्हटले आहे.

संपादन - धनाजी सुर्वे