इचलकरंजी (कोल्हापूर) : शहरात कोरोनाचे रूग्ण मोठ्या प्रमाणात वाढू लागल्याने स्थानिक प्रशासनाने इचलकरंजी शहर 72 तास पूर्णपणे लॉकडाऊन करण्याचा निर्णय घेतला आहे. येथील जलतरण तलावाच्या कार्यालयात पालिका पदाधिकारी व प्रशासन यांच्या संयुक्त बैठकीत आज दुपारी हा निर्णय घेण्यात आला. त्यामुळे मंगळवार ते गुरूवार शहरातील सर्व व्यवहार पुन्हा एकदा ठप्प राहणार आहेत.

इचलकरंजी शहरात गेल्या 15 दिवसात रूग्णांची संख्या सतत वाढत आहे. यातून समूह संसर्ग सुरू झाल्याने नागरिकांच्यात भिती निर्माण झाली आहे. नागरिकांना चार दिवसापूर्वीच शहर लॉकडाऊन होईल अशी आशा होती. मात्र स्थानिक प्रशासनाने जिल्हाधिकार्‍यांचा सल्ला घेत तीन दिवस हा विषय प्रलंबीतच ठेवला. जिल्हाधिकारी यांनी असणारे निर्बंध अधिक कडक पध्दतीने राबवावेत अशी सूचना केली. दरम्यान आरोग्य राज्यमंत्री राजेंद्र पाटील-यड्रावकर यांनीही बैठक घेऊन शहरातील परिस्थितीचा आढावा घेतला. यावेळी त्यांनी स्थानिक प्रशासनानेच संपूर्ण लॉकडाऊनबाबत निर्णय घ्यावा असेही सूचीत केले होते.

हेही वाचा- इचलकरजीचा 25 टक्‍क्‍याहून अधिक भाग कोरोना बाधीत - 

वाचा सविस्तर...

शहरातील अनेक घटकांनी वाढत्या संसर्गाच्या पार्श्‍वभूमीवर बंदची मागणी केली होती. त्यामुळे प्रशासनाला शहर संपूर्ण लॉकडाऊन करण्याशिवाय पर्याय नव्हता. मात्र हा कालावधी किती दिवसाचा असावा याबाबतची उत्सुकता लागून होती. सोमवारी दुपारी याबाबत बैठक झाली. या बैठकीस नगराध्यक्षा सौ. अलका स्वामी, उपनगराध्यक्ष तानाजी पोवार, सागर चाळके,  पोलिस उपाधिक्षक गणेश बिरादार, मुख्याधिकारी संतोष खांडेकर, नगरसेवक मदन कारंडे, शशांक बावचकर, संजय कांबळे, महादेव गौड, विठ्ठल चोपडे आदींची उपस्थिती होती.

हेही वाचा- मुंबईहुन भुयेवाडी (ता. करवीर) येथे आलेला तरुण निघाला कोरोना पॉझिटिव्ह अन्... -

वाचा सविस्तर...

 72 तास संपूर्ण लॉकडाऊन

शहरात तब्बल कोरोनाचे 70 रूग्ण सापडले असून यातील 59 रूग्ण सध्या अ‍ॅक्टीव्ह आहेत. संसर्ग पसरू नये यासाठी 20 भाग सील करण्यात आले आहेत. यापुढील उपाययोजना म्हणून आता शहर 72 तास संपूर्ण लॉकडाऊन होणार आहे.