Land Slide In Kolhapur Shahuwadi : कोल्हापूरमधील शाहूवाडी तालुक्यामध्ये भुस्खलनाची घटना घडल्याचे समोर आले आहे. करंजफेणमधल्या धावडाखिंडीमध्ये ही घटना घडली असून, सध्या या ठिकाणी मातीचा ढिगारा बाजूला करून वाहतूक सुरळीत करण्याचं काम युद्धपातळीवर सुरू करण्यात आले. गेल्या काही दिवसांपासून कोल्हापूरमध्ये पावसाने जोरदार बॅटिंग केली आहे. यामुळे येथील पंचगंगेच्या पाणी पातळीत मोठ्या प्रमाणात वाढ झाली असून, पूरस्थिती निर्माण झाली आहे. सुदैवाने या घटनेत कोणतीही मोठी हानी झालेली नाही.

गेल्या काही दिवसांपासून कोल्हापूर जिल्ह्यातील शाहुवाडी, गगनबावडा, राधानगरी या तालुक्यांमध्ये मोठ्या प्रमाणात पावसाने हजेरी लावली होती. यामुळे कोल्हापूर येथील शाहुवाडी तालुक्यातील करंजफेण परिसरात भुस्खलन झाले. यामुळे मातीचा मोठ्या प्रमाणात ढिगारा रस्त्यावर आला असून, यामुळे येथील वाहतूक काही काळासाठी बंद करण्यात आली होती. मात्र, युद्धपातळीवर रस्त्यावर आलेला मातीचा ढिगारा आणि गाळ बाजूला करण्यात प्रशासनाला यश आले असून, वाहतूक पुन्हा पूर्ववत करण्यात आली आहे.

शाहुवाडी तालुक्यात मोठ्या प्रमाणात डोंगर आणि दऱ्या आहेत. त्यामुळे वारंवार येथे अशा प्रकारच्या घटना घडत असतात. यासर्वांकडे जिल्ह प्रशासनाचं लक्ष असून कोणत्याही प्रकारची वाहतूक कोंडी होऊ नये तसेच कोणतीही मोठी अप्रिय घटना घडू नये यासाठी जिल्हा प्रशासन काळजी घेताना दिलू येत आहे.