निपाणी - कोरोनाच्या पार्श्वभूमीवर अत्यंत महत्त्वपूर्ण असलेल्या मास्कचा विषय निपाणी शहर आणि परिसरात ऐरणीवर आला आहे. वापरलेले मास्क मोठ्या प्रमाणावर बेदरकारपणे रस्त्यावर फेकून दिले जात आहेत. मुळातच नागरिकांनी वापरलेले मास्क कुठे टाकावेत, असा प्रश्न या निमित्ताने निर्माण झाला आहे.  त्यांच्यामुळे संसर्गाचा धोका होऊ शकतो. त्यामुळे नगरपालिकेने प्रत्येक घंटागाडीसोबत ओला व सुका कचरा यासोबत मास्क गोळा करण्याचीही सोय करण्याची मागणी होत आहे.

वाचा - तुम्हाला मिळत असलेली 'साप्ताहिक सुट्टी' कशी आणि कधी पासुन सुरु झाली माहित आहे का ?

'ते' मास्क सुरक्षित फेका, अन्यथा 'धोका'!

कोरोनाच्या पार्श्वभूमीवर घराबाहेर पडताना दंडात्मक कारवाई टाळण्यासाठी मास्क वापरणे बंधनकारक झाले आहे. या नवीन लाईफ स्टाईलची आता सवयच करून घ्यावी लागणार आहे. कोरोनामुळे विविध पक्ष, सामाजिक संघटना, मंडळांनी मोठ्या प्रमाणात मास्कचे वाटप केले आहे. वापरानंतर त्याची योग्य पद्धतीने विल्हेवाट लावली पाहिजे. प्रत्येक रुग्णालयातून निघणाऱ्या कचऱ्याची विल्हेवाट लावण्यासाठी स्वतंत्र व्यवस्था आहे. मात्र घरात वापरलेला मास्क कसा आणि कुठे टाकावा हा प्रश्न नागरिकांसमोर उभा आहे. ते मास्क सरळ कचऱ्यात टाकत आहेत. काहीजण तर रस्त्यावर टाकून रिकामे होत आहेत. परिणामी कोरोनाला आमंत्रणच देण्यात येत आहे. धोका टाळण्यासाठी आता घराघरातून निघणारे मास्क गोळा करण्यासाठी घंटागाडीवर वेगळा डबा किंवा पिशवी ठेवण्याची मागणी नागरिकांतून होत आहे.

'माझा कचरा, माझी जबाबदारी'

शहर आणि ग्रामीण भागातील बहुतांश नागरिक वापरलेले मास्क रस्त्यावर अथवा कचऱ्यात टाकून देत आहेत. त्यामुळे होणार्‍या दुष्परिणामांबाबत संबंधित नगरपालिका आणि ग्रामपंचायतीने जनजागृती करून 'माझा कचरा, माझी जबाबदारी' ही संकल्पना राबविण्याची गरज आहे.
 

'कोरोनाचा संसर्ग रोखण्यासाठी प्रत्येकाने मास्क वापरणे अनिवार्य असले तरी तो इतरत्र टाकता कामा नये. वापरलेला मास्क जमिनीत पुरणे अथवा जंतूविरहित करणे हे प्रत्येकाचे कर्तव्य आहे. अन्यथा धोका अटळ आहे.'
- डॉ. संदीप चिखले,
निपाणी