हातकणंगले (कोल्हापूर) : वाहतुकीला अडथळा ठरणारी वाहने बाजूला करण्यांवरून हातकणंगले नगरपंचायतीचे नगराध्यक्ष अरूण जानवेकर आणि माजी उपसरपंचाचे पती प्रकाश पाटील- नाधवडेकर यांच्यांत आज भर बाजारांत हाणामारी झाली.  एकमेकाला अर्वाच्य भाषेत शिवीगाळ करत प्रकरण मारामारीपर्यंत गेले. यावेळी नागरिकांनी मोठी गर्दी केली होती. प्रकरण पोलिस ठाण्यांत गेल्यानंतर तडजोडीनंतर यावर पडदा टाकण्यांत आला. दरम्यान या हाणामारीचा व्हिडिओ सोशल मिडीयांवर व्हायरल झाल्याने तो चर्चेचा विषय ठरला आहे.

अधिक माहिती अशी, 
सकाळी अकराच्या सुमारास प्रकाश पाटील आपली कार घेऊन निघाले होते. नगरपंचायत इमारती जवळ आले असता दुर्तफा लावलेल्या वाहनांमुळे वाहतूक जाम झाली होती. त्यामुळे याबाबत पाटील यांनी नगरपंचायत कार्यालयात जाऊन आरडाओरडा केला. याचवेळी नगराध्यक्ष जानवेकरही आपली कार घेऊन आले.वाहतूक कोंडीमुळे त्यांनाही रस्ता मिळेना. यावेळी पाटील व जानवेकर यांच्यात वाहने बाजूला घेण्यावरुन तू मी सुरू झाली.

हेही वाचा- राऊतवाडी धबधब्यालगतच्या राधानगरी तलावात कोल्हापूरच्या सराफाचा बुडून मृत्यू

 पाटील यांनी गाडी बाजूला घेत नाही अशी भूमिका घेत शिवीगाळ सुरू केली, त्यावेळी राग सहन न झाल्याने नगराध्यक्षांनी थेट त्याच्या कानशिलात लगावली. त्यामुळे संतप्त झालेल्या पाटील यांनीही नगराध्यक्षांची कॉलर धरत मारहाण केली. काही जणांनी दोघांना बाजूला करण्याचा प्रयत्न केला, मात्र बराच वेळ दोन्ही बाजूनी आश्लिल शिवीगाळ सुरूच होती. त्यामुळे बघ्यांनी मोठी गर्दी केली होती. अखेरीस हे प्रकरण पोलीस ठाण्यांत गेल्यानंतर त्यावर पडदा टाकण्यांत आला. मात्र थेट नगराध्यक्षांवर हात उगारण्याच्या या घटनेची चर्चा परिसरांत सुरू आहे.

हेही वाचा- Covid Vaccine : कोरोना लस खरच सुरक्षित आहे का ? याचा केलेला ग्राउंड रिपोर्ट वाचा सविस्तर

मद्यधुंद अवस्थेतील पाटील यांनी गाडी आडवी लावत प्रशासनांसहीत अनेकांना आश्लिल भाषेत शिवीगाळ केली. त्यामुळे संयम सुटल्याने कानशिलात लगावली.

अरूणकुमार जानवेकर,नगराध्यक्ष,हातकणंगले

वाहतूकीला अडथळा होत असल्याबद्दल जाब विचारला असता नगराध्यक्षांनी थेट भररस्त्यांत मारहाण केली. त्यामुळे मी ही त्यांच्या अंगावर गेलो. मारहाणीचे अधिकार त्यांना कोणी दिले.

प्रकाश पाटील -नाधवडेकर,हातकणंगले

संपादन - अर्चना बनगे