कोल्हापूर : ज्या व्यापाऱ्यांचे विमे(insurance) संपले असतील त्यांनी नुतनीकरण करुन घ्यावेत, अथवा नवीन करावेत. जर एखादी विमा कंपनी विमा उतरविण्यास इच्छूक नसेल तर त्याची कल्पना द्यावी, असे आवाहन कोल्हापूर चेंबर ऑफ कॉमर्स अँड इंडस्ट्रीज(kolhapur chamber of commerce and industries) तर्फे सर्व व्यापाऱ्यांना केले आहे. यासंदर्भात आढावा बैठक ३१ जानेवारीला घेण्याचाही निर्णय घेतला आहे.

जिल्हाधिकारी कार्यालयात काल पालकमंत्री सतेज पाटील(satej patil) यांच्या अध्यक्षतेखाली सर्व विमा कंपनी प्रतिनिधी व कोल्हापूर चेंबर ऑफ कॉमर्स अँड इंडस्ट्रीज व तिच्या संलग्न संघटना प्रतिनीधींची बैठक झाली. यात २०२१ मध्ये आलेल्या पूरग्रस्त व्यापाऱ्यांचे ‘क्लेम’ ताबडतोब मंजूर करावे व २०१९ चा महापूर आल्यानंतर ज्या व्यापाऱ्यांनी विमा नुतनीकरण केलेले नाही किंवा विमा उतरण्यासाठी विमा कंपनीने नकार दिला त्यासंदर्भात बैठकीत चर्चा झाली. बैठकीत ३१ जानेवारी पर्यंत पूररेषेतील व्यापाऱ्यांनी आपला विमा उतरुन घ्यावा, असे पालकमंत्री पाटील यांनी सांगितले. जिल्हाधिकारी राहुल रेखावार यांनी सरकारी (शासन दरबारी) पंचनामे हवे असल्यास त्यांची नांवे द्या. आम्ही ताबडतोब उपलब्ध करुन देतो. त्यासाठी कोणतीही विमा प्रकरणे थांबवू नका असे निर्देश दिल्याचेही चेंबर ऑफ कॉमर्स ॲण्‍ड इंडस्ट्रीजच्या प्रसिद्धी पत्रकातम्हटले आहे.