कोल्हापूर :  ‘‘काँग्रेस, राष्ट्रवादी काँग्रेस, शिवसेना व मित्र पक्षांची एकत्रित ताकद मिळाल्यामुळे महाविकास आघाडीचे शिक्षक मतदारसंघाचे उमेदवार प्रा. जयंत आसगावकर व ‘पदवीधर’चे उमेदवार अरुण लाड यांच्या विजयाची वाट सुकर झाली आहे. तरीही गाफिल न राहता उरलेल्या दिवसात जोमाने प्रयत्न करा. मतदानादिवशी शंभर टक्के मतदान होईल याची दक्षता घ्या व या दोन्ही उमेदवाराना विजयी करा,’’ असे आवाहन कोल्हापूर दक्षिणचे आमदार ऋतुराज पाटील यांनी केले.

फुलेवाडी रिंग रोड येथील शिक्षक व पदवीधर मतदारांच्या मेळाव्यात ते बोलत होते. ते म्हणाले,‘प्रा. आसगावकर यांचा शैक्षणिक क्षेत्रातील अभ्यास मोठा आहे. त्यांना शैक्षणिक क्षेत्रातील प्रश्नाची जाण असल्यामुळे ते शिक्षण विषयक व शिक्षकांचे प्रश्न ताकदीने मांडतील. ‘पदवीधर’चे उमेदवार अरुण लाड यांना ही शैक्षणिक क्षेत्राचा मोठा वारसा लाभला आहे. पदवीधरच्या प्रश्नांची उकल करण्याची ताकद त्याच्यामध्ये आहे. त्यामुळे पदवीधर मतदारानी आपला प्रतिनिधी म्हणून श्री लाड यांना निवडावे.’’
या वेळी सौ. अनु जयंत आसगावकर म्हणाल्या, ‘‘आसगावकर परिवाराने बहुजनाच्या शिक्षणासाठी जे योगदान दिले आहे, शैक्षणिक आव्हाने परतवून लावण्यासाठी जो संघर्ष केला आहे याची नोंद घेऊन प्रा. आसगावकर यांना मतदान करून निवडून आणावे.’’ 

हेही वाचा- 5 लाख खर्चून काळ्या दगडात बांधलेल्या ऐतिहासिक वास्तूत घडलेल्या व्यक्तिमत्वांवर एक नजर -

या वेळी नगरसेवक शारंगधर देशमुख, वसंतराव देशमुख, प्रा. महादेव नरके व श्री. उदय पाटील यांनी आपली मनोगत व्यक्त केली. किरण पाटील यांनी स्वागत व प्रस्ताविक केले. संदीप मगदूम यांनी सूत्रसंचालन केले. पी. एस. शिंदे यांनी आभार मानले. यावेळी सविता पाटील, एन. के. चव्हाण, बाजीराव कांबळे, अर्जुन पाटील, डी. डी. पाटील, अमित रजपूत, प्रशांत पोतदार, राजेंद्र तोंदकर, संतराम कांबळे, शिवाजी पाटील, वैशाली पाटील, शारदा पाटील, अनुराधा वणकुंद्रे आदी उपस्थित होते.

संपादन- अर्चना बनगे