कोल्हापूर - येथील शहरातील मध्यवर्ती असणाऱ्या मुख्य मटण मार्केट मध्ये मास विक्री बंद करण्याचा निर्णय खाटीक समाजाने घेतला आहे. या मुळे मटणासह, चिकन आणि मासे विक्री बंद राहणार आहे. कोरोना विषाणूचा संसर्गाच्या धोका लक्षात घेता गर्दी टाळण्यासाठी हा निर्णय घेण्यात आल्याची माहिती कोल्हापूर जिल्हा खाटीक समाजाचे अध्यक्ष विजय कांबळे यांनी दिली. 

हे मुख्य मटण मार्केट जरी बंद राहणार असले तरीही संपूर्ण जिल्ह्यातील मटण, चिकन व मासे विक्री सुरू राहणार असल्याचे त्यांनी स्पष्ट केले.
  सर्वत्र संचारबंदी असताना देखील कोल्हापूरकरांना मटण खायला मिळत नसल्यामुळे अस्वस्थ झाले होते. महानगरपालिकेने मास विक्रीसाठी परवानगी देताच मास खरेदीसाठी प्रचंड गर्दी झाली. या गर्दीमुळे या बंदच्या मुख्य उद्देशालाच तडा गेल्यामुळे मुख्य मटण मार्केट मध्ये मटण, मासे, चिकन विक्री बंद करण्याचा निर्णय घेण्यात आला आहे.

सीमा बंदीमुळे अशी झालीय पती - पत्नीची ताटातुट... 

मटण विक्री वरील बंदी उठल्यानंतर चिकन खरेदीसाठी होम कॉरंटाईन असणाऱ्या तीन व्यक्ती आल्या. शिवाय त्यातील एक व्यक्ती चिकन खरेदीसाठी मार्केटमध्ये गेली तर उर्वरित दोन व्यक्ती मार्केटच्या बाहेर उभ्या होत्या. त्यांनी हातामध्ये ग्लोव्स घातल्याने संशय बळावल्याने त्यांची चौकशी केली असता त्या तिन्ही व्यक्ती होम कॉरंटाईन असल्याचे लक्षात आले. या मुळे खबरदारी म्हणून या परिसरामध्ये असणाऱ्या नागरी वस्तीतली रहिवाशांना धोका होऊ नये म्हणून आगामी काही काळासाठी मुख्य मटण मार्केट बंद ठेवावे अशी विनंती देखील येथील नागरिकांनी केली होती. त्यानुसार मुख्य मटण मार्केट बंद ठेवण्याचा निर्णय झाला असल्याचे विजय कांबळे यांनी सांगितले. मात्र जिल्ह्यात सर्वत्र मटण चिकन व मासे विक्री सुरू राहणार असल्याचेही त्यांनी स्पष्ट केले. नागरिकांनी मटन, चिकन अथवा मासे खरेदीसाठी आल्यानंतर कोरोनाच्या पार्श्वभूमीवर प्रशासनाने सांगितलेल्या सूचना आणि प्रतिबंधात्मक उपाययोजनांचे पालन करावे, असे आवाहनही विजय कांबळे यांनी केले आहे.