कोल्हापूर : नुकतेच झालेल्या राज्यसभेच्या निवडणूकीत कोल्हापूरचे भाजप उमेदवार धनंजय महाजिक यांनी विजय मिळवला आहे, या विजयानंतर आज त्यांचे कोल्हापूरात जंगी स्वागत करण्यात आले. यावेळी खासदार महाडिक यांच्या स्वागतासाठी संपूर्ण महाडिक कुटुंबिय एकत्र आले होते. (mp dhananjay mahadik Meet his uncle mahdev mahadik in shiroli after win in rajya sabha election)

दरम्यान राज्यसभा निवडणूक जिंकल्यानंतर आज खासदार धनंजय महाडिक कोल्हापूरला परतले. तेव्हा सर्वप्रथम शिरोली येथे जाऊन त्यांनी काका महादेवराव महाडिक यांची भेट घेतली. यावेळी धनंजय महाडिक यांना अश्रू अनावर झाले. हा क्षण संपूर्ण महाडिक कुटुंब आणि त्यांच्या सर्व कार्यकर्त्यांसाठी अतिशय भावनिक असा होता.

दरम्यान आज धनंजय महाडिक पत्रकारांशी संवाद साधताना म्हणाले, पुरेसं संख्याबळ असल्यानेच मला उमेदवारी जाहीर झाली. त्यामुळे घोडेबाजार करण्याचा मुद्दा येत नाहीत. आमदार काही विकावू नाहीत. राज्यसभेला गुप्त मतदान पद्धत नसतानाही भाजपचे तिन्ही उमेदवार विजयी झाले आहेत. विधानपरिषद निवडणुकीवरूनही महाविकास आघाडी सरकारला जाहीर इशारा दिला.

पुढे बोलताना ते म्हणाले संघर्ष महाडिकांच्या पाचवीलाच पुजला आहे. राज्यात महाविकास आघाडी सरकार 2019 मध्ये अस्तित्वात आलं असलं, तरी हे तिन्ही पक्ष महाडिकांविरुद्ध कोल्हापूर लढल्याचे त्यांनी सांगितले. कोल्हापूरमध्ये भाजपचा एकही आमदार खासदार नाही, महापालिकेत सत्ता नाही, जिल्हा परिषदेत सत्ता होती, पण ती आता नाही. महाडिकांचा दबदबा कालही होता, आजही आहे आणि पुढील 100 वर्ष राहिल असे सांगत त्यांनी पालकमंत्री सतेज पाटील यांना एकप्रकारे जाहीर इशारा दिला आहे. त्यामुळे जिल्ह्याच्या राजकारणाची दिशा स्पष्ट झाली आहे, असे ते म्हणाले.