उजळाईवाडी (कोल्हापूर)  : कोरोना संसर्गामुळे सात महिन्यांपासून खंडित झालेली कोल्हापूर-मुंबई विमानसेवा आजपासून पूर्ववत सुरू झाली असून, आठवड्यातील मंगळवार, बुधवार व गुरुवार, अशी सलग तीन दिवस ही विमानसेवा नियमितपणे सुरू राहणार आहे. २४ मार्चपासून बंद असलेल्या  ट्रु जेट कंपनीच्या विमानाने आज दुपारी २ वाजून ४५ मिनिटांनी  ३० प्रवाशांसह कोल्हापुरात लॅंडिंग केले, तर ३ वाजून ५ मिनिटांनी या विमानाने परत २५ प्रवाशांसह मुंबईसाठी टेकऑफ केले.

हेही वाचा- रुग्ण सेवेसाठी वैद्यकीय अधिकाऱ्यांची पदरमोड -

मुंबई-कोल्हापूर या विमान सेवेला आतापर्यंत प्रवाशांचा चांगला प्रतिसाद मिळाला असून, कोरोना संसर्गाच्या पार्श्वभूमीवर मुंबई विमानतळावर विमान उड्डाण्णांना मर्यादा असल्यामुळे आठवड्यातून फक्त तीन दिवस मंगळवार, बुधवार, गुरुवार ही विमानसेवा आजपासून नियमित सुरू राहणार आहे. मुंबई विमानसेवा सुरू व्हावी, अशी प्रवाशांची जोरदार मागणी होती. परंतु, मुंबईमधील मर्यादित विमान उड्डाणामुळे ही विमानसेवा सुरू करणे अशक्‍य बनले होते. मात्र, कोल्हापुरातील लोकप्रतिनिधी, जिल्हा प्रशासन व विमानतळ प्राधिकरणाच्या विशेष व अथक प्रयत्नातून मुंबई कोल्हापूर विमानसेवा पुन्हा 
सुरू झाली आहे. 

१५ नोव्हेंबरनंतर मुंबई विमानतळावरील विमान उड्डाणाच्या मर्यादा शिथिल होऊन उड्डाणे पूर्ववत झाल्यानंतर पूर्वीप्रमाणे आठवड्यातून सहा दिवस विमानसेवा सुरू करण्यासाठी प्रयत्न सुरू आहेत.
- कमलकुमार कटारिया, संचालक, कोल्हापूर विमानतळ प्राधिकरण
 

महेश कोठारे यांचे विमानाने आगमन
मराठी सिनेसृष्टीतील प्रसिद्ध अभिनेते, निर्माते, दिग्दर्शक महेश कोठारे यांचे मुंबई विमानाने कोल्हापुरात आगमन झाले. यावेळी त्यांच्यासोबत सेल्फी काढण्यासाठी त्यांच्या चाहत्यांनी गर्दी केली होती.

संपादन - अर्चना बनगे