कोल्हापूर - नवरात्रोत्सवाच्या तिसऱ्या दिवशी आज करवीर निवासिनी श्री अंबाबाईची पन्हाळ्यावरील नागांना दर्शन रूपात सालंकृत पूजा बांधण्यात आली. पराशर मुनींच्या पन्हाळ्यावरील विष्णुरूपी पुत्रप्राप्तीसाठीच्या तपोसाधनेची झळ नागलोकांना होवू लागली. त्यामुळे त्यांनी पराशरांच्या तपात विघ्ने आणली. परंतु शेवटी शापभयाने नागलोक पराशरांनाच शरण जातात व सुरक्षित राहण्यासाठी योग्य जागेविषयी विचारतात. तेंव्हा पराशर मुनी त्यांना करवीर क्षेत्री जावून श्री अंबाबाईचे दर्शन घेवून देवीला याबाबत विचारण्यास सांगतात. त्यामुळे नागलोक अंबाबाईचे दर्शन घेवून तिची स्तुती करतात, असे या पुजेचे महात्म्य असल्याचे श्रीपूजक मकरंद मुनीश्‍वर व माधव मुनीश्‍वर यांनी सांगितले. 

हे पण वाचा - दख्खनचा राजा श्री जोतिबा देवाची दुसऱ्या दिवशीची सोहन कमलपुष्पातील पूजा

बुधवारी ललिता पंचमी 

बुधवारी (ता. 21) ललिता पंचमीचा सोहळा होणार आहे. कोरोनाच्या पार्श्‍वभूमीवर यंदा अत्यंत साधेपणाने हा सोहळा होणार असून यानिमित्ताने भरणारी त्र्यंबोली यात्राही रद्द करण्यात आली आहे. श्री अंबाबाई, श्री तुळजाभवानी व गुरूमहाराज वाड्यातील पालख्या सजवलेल्या वाहनांतून टेंबलाई टेकडीवर रवाना होतील आणि दुपारी बाराच्या सुमारास कोहळा फोडण्याचा पारंपरिक विधी मोजक्‍याच मानकऱ्यांच्या उपस्थितीत होईल. 

संपादन - धनाजी सुर्वे