कोल्हापूर : उणे २० अंश सेल्सिअसचे तापमान, रक्त गोठवणारी थंडी, रात्रीच्या अंधारात चांदण्याच्या प्रकाशामुळे उजळून निघालेले बर्फाचे आच्छादन आणि सीमेवरील खडा पहारा, अशा या वातावरणात कोल्हापूरचा गणेश खंबीर उभा आहे. राष्ट्रीय फुटबॉल खेळाडू अशी ओळख असणारा गणेश सुकुमार दाते वयाच्या २५ व्या वर्षी देशसेवेसाठी सीमेवर उभा आहे. 

 भारत आणि पाकिस्तान या दोन देशांतील संघर्ष आणि त्यामुळे निर्माण होणारी तणावाची स्थिती कायम आहे. त्यातच सध्या सीमेवर चिनी सैन्याकडून सुरु असणाऱ्या कुरापतींमुळे भारत आणि चीन या देशांतील तणाव वाढले आहेत. कोल्हापूरचा उमदा तरुण फुटबॉल खेळाडू अतिसंवेदनशील मानल्या जाणाऱ्या जम्मू-काश्‍मीर येथील राजुरी सेक्‍टर इथे तैनात आहे. पुलवामा हल्ल्यानंतर हा भाग सर्वाधिक संवेदनशील झाला आहे. संपूर्ण परिसर बर्फाने आच्छादलेला आहे. 

हेही वाचा- जागतिक योगा दिन : एक साधी गोळीही घेतली नाही, योगामुळेच जगलो  शंभर वर्षे...! -

तीन फुटांहूनही अधिक बर्फाच्या आच्छादनातून वाट काढावी लागते. येथील हवामान उणे २० अंश सेल्सियस इतके आहे, तर २४ तासांमध्ये ३ ते ४ तासांची विश्रांती येथील जवानांना मिळते. असे असताना देशसेवेसाठी हे जवान रोजच जीव धोक्‍यात घालून संपूर्ण देशाच्या सुरक्षेसाठी तत्पर आहेत. गणेश दाते याने प्राथमिक शिक्षण महाराष्ट्र हायस्कूलमधून पूर्ण केले तर राष्ट्रीय फुटबॉल स्पर्धांत खेळताना १९ वर्षांखालील गटात त्याचा सहभाग होता. यानंतर त्याने दिलबहार तालीम, कोल्हापूर पोलिस संघातून उत्कृष्ट खेळ केला.

 मुंबई स्थित संघातही त्याने खेळ केला आहे. त्यातच पोलिस भरतीतील त्याच्या प्रयत्नाला अवघ्या दोन गुणांनी हुलकावणी दिली. या नंतर लगेचच त्याने हैदराबाद येथे सैन्य भरतीत सहभाग घेतला. येथे यश प्राप्त करून त्याने सैन्य दलाच्या तीन वर्षाच्या सेवेत वैष्णोदेवी, पुलवामासारख्या संवेदनशील ठिकाणी देशसेवा केली आहे. जरग गल्ली, मंगळवार पेठ येथे त्याचे आई- वडील राहतात. वडील सुकुमार दाते  सिक्‍युरिटी गार्ड म्हणून 
काम करतात.

हेही वाचा- बारा वर्षापूर्वी तो मिऴाला रस्त्याच्या कडेला उघड्यावरती आणि आता घडले असे काहीकी... -

देशाची सेवा करावी, आपल्या अंगावर वर्दी असावी, असे गणेशचे नेहमीच स्वप्न होते. हे स्वप्न तो जगतो आहे. सैन्यभरतीला गेलेला गणेश अजूनही घरी परतलेला नाही. कधी तरीच फोनवर बोलणे होते. या व्यतिरिक्त संपर्क साधणे शक्‍य होत नाही.
- सुकुमार दाते, वडील