जोतिबा डोंगर - येथील श्री दख्खनचा राजा श्री जोतिबा देवाच्या दर्शनासाठी महाराष्ट्र कर्नाटक राज्यातील भाविक येत आहेत. आज रविवार व चौथी माळ असल्याने गर्दीने डोंगर खचाखच भरला. चांगभलच्या जयघोषाने डोंगर दुमदुमला.

आज करवीर निवासिनी श्री महालक्ष्मी देवीचे दर्शन घेऊन पर राज्यातील भाविकांच्या झुंडीच्या झुंडी डोंगरावर आल्या. यामध्ये महिला भाविकांची संख्या लक्षणीय होती. आज नवरात्र उत्सवातील चौथा दिवस त्यामुळे मंदीरातील समईमध्ये तेल घालण्यासाठी या भाविकांनी मोठी गर्दी केली. तसेच काहीनी कडाकण्या अर्पण केल्या.

आज दिवसभर कडक उन्हात भाविकांच्या झुंडी डोंगरावर येत राहिल्या. रात्री उशिरापर्यंत भाविकांची मोठी गर्दी डोंगरावर होती. भाविकांच्या सुरक्षेसाठी कोडोली पोलीस ठाणेचा बंदोबस्त होता. साहाय्यक पोलीस निरीक्षक कैलास कोडग फौजदार मनोज कदम हे दिवसभर डोंगरावर गर्दीवर नियंत्रण ठेवून होते. आज सकाळी दहा वाजता मूळ माया यमाई मंदीराकडे सवाद्य मिरवणूकीने धुपारती सोहळा गेला.

यावेळी देवस्थानचे अधिक्षक धैर्यशील तिवले सिंदीया देवस्थानचे अधिक्षक अजित झूगर पुजारी ग्रामस्थ सर्व देवसेवक उपस्थित होते. धुपारती सोहळ्याचे गावातील सुहासिनी महिलांनी पंचारतीने स्वागत केले तसेच यावेळी सुगंधी दुधाचे वाटप करण्यात आले.

दुपारी बारा वाजता धुपारती आरती सोहळा मुख्य मंदिरात आल्यानंतर प्रविण डबाणे यांनी तोफेची सलामी दिली. येत्या गुरुवारी जोतिबा देवाचा जागर सोहळा होणार असून या दिवशी मंदिर दर्शनासाठी दिवस रात्र खुले राहील. तसेच मंदिरात विविध धार्मिक विधी तसेच विविध धार्मिक कार्यक्रमांचे आयोजन करण्यात आले आहे. तसेच येत्या शनिवारी जोतिबा देवाचा पहिला पालखी सोहळा सुरू होईल.