कोल्हापूर - दिवसेंदिवस जिल्ह्यात कोरोनाबाधितांची संख्या वाढत आहे. काल दिवसभरात ७८ कोरोना बाधितांची नोंद झाल्यानंतर आज दुपारपर्यंत आणखी ५५ रूग्णांची नोंद झाली आहे. त्यामुळे जिल्ह्यातील कोरोना रूग्णांची संख्या आता १६१९ वर पोहचली आहे. त्यामुळे जिल्हावासियांची चिंता वाढली आहे. इचलकरंजीतही कोरोनाने हाहाकार माजवला आहे. तेथे कोरोनाच्या रूग्णांनी दोनशेचा अकडा ओलांडला आहे. 

आज पाॅझिटिव्ह आढळलेल्यांमध्ये पन्हाळा बारा, करवीर नऊ, चंदगड चोवीस, कोल्हापूर शहर पाच तर इचलकरंजीतील चार जणांचा समावेश आहे. यामध्ये सर्वात जास्त चंदगड तालुक्यातील रूग्णांचा समावेश आहे. 

वस्त्रनगरी हादरली  ; द्वीशतक पार

इचलकरंजी शहरातील कोरोना रुग्ण संख्यने आज सकाळीच द्वीशकाचा टप्पा पार केला आहे. काल दिवसभरात तब्बल १५ जणांचे अहवाल पॉझीटीव्ह आले होते. आज चार नविन रुग्ण आढळून आले आहेत. सद्या शहरात आतापर्यंत रुग्णांची संख्या २०१ पर्यंत पोहचली आहे.

काल सकाळी श्रीपादनगर, पाटील मळा, केटकाळे गल्ली, टिळक रोड, बंडगर माळ या परिसरातील प्रत्येकी एक रुग्ण आढळून आले. यामध्ये तीन पुरुष व एका महिलेचा समावेश आहे. तर काल  सांयकाळी आलेल्या अहवालामध्ये १० पॉझीटीव्ह आले. यामध्ये गणेशनगरमधील यंत्रमाग कारखाना कनेक्शनमधून जवाहरनगरमधील पाचजणांना संसर्ग झाला आहे. या शिवाय आंबेडकरनगर, शास्त्री सोसायटी, थोरात चौक, साईनगर (शहापूर) येथील प्रत्येक एक रुग्ण काल बाधीत झाल्याचे अहवालातून स्पष्ट झाले आहे. आयजीएम रुग्णालयात उपचार घेणार्‍या ७० वर्षाच्या वृध्दालाही कोरोना संसर्ग झाल्याची माहिती प्रशासनाकडून देण्यात आली.

हे पण वाचा - Video - बंबात जाळ अन्‌ कोल्हापूरचा विषयच हार्ड; या भावाच्या व्हिडिओने लावलंय सगळ्यांनाच याड

दरम्यान आज शुक्रवारी आणखी चौघांना संसर्ग झाला. यामध्ये लालनगर, मोठे तळे, षटकोन चौकातील रुग्णांचा समावेश आहे.
यापूर्वी शहरात ठरावीक भागातच रुग्णांची संख्या आढळून येत होती. आज मात्र शहरातील सर्वच भागात रुग्ण आढळून आले आहेत. त्यामुळे भितीचे वातावरण आहे. शहरात तब्बल ५० कंटेन्मेंट झोन झाले आहेत. त्यामुळे ५० टक्क्यापेक्षा जास्त शहर लॉक डाऊन झाले आहे. दिलासादायक बाब म्हणजे कोरोनामुळे मृत्यूची सुरु असलेली मालिका गुरूवारी खंडीत झाली. तर कोरोनामुक्त होणार्‍यांचीही संख्या आता वाढत चालली आहे.

संपादन - धनाजी सुर्वे