कोल्हापूर : शहरात घडणाऱ्या मृत व्यक्तींचे दहन अथवा दफन करण्यासाठी कोणत्याही रजिस्टर्ड मेडिकल प्रॅक्टिशनर अथवा खासगी किंवा शासकीय दवाखान्यातील वैद्यकीय अधिकाऱ्यांच्या प्रमाणपत्रावर आता स्मशानभूमी अथवा दफनभूमी येथे मृत व्यक्तींचे अंत्यसंस्कार होऊ शकतील, अशी माहिती महापालिका आयुक्त डॉ. कादंबरी बलकवडे यांनी आज दिली.

हेही वाचा - डोंगर उतारावर पिकवली आले शेती ; पन्हाळा तालुक्यातील शेतकऱ्याचा यशस्वी प्रयोग
 

महापालिकेच्या सभागृहाचा कार्यकाळ रविवारी (१५)  संपुष्टात आला. सद्य:स्थितीत महापालिका कार्यक्षेत्रात घडणाऱ्या मृत व्यक्तींचे दहन अथवा दफन नगरसेवकांच्या मृत्यू प्रमाणपत्रावरुन करण्यात येत होते. यापुढे नागरिकांच्या सुविधेसाठी सोमवारी (१६) पासून नूतन सभागृह अस्तित्वात येईपर्यंत शहरात घडणाऱ्या मृत व्यक्तींचे दहन अथवा दफन करण्यासाठी कोणत्याही रजिस्टर्ड मेडिकल प्रॅक्टिशनर अथवा खासगी किंवा शासकीय दवाखान्यातील वैद्यकीय अधिकारी यांचे प्रमाणपत्र ग्राह्य धरण्यात येणार आहे. 

हेही वाचा -  कोल्हापुरच्या वीर पुत्राला अखेरचा सलाम -

महापालिका क्षेत्रातील एखाद्या नागरिकाचा घरी नैसर्गिक मृत्यू झाल्यास त्याला स्थानिक नगरसेवकाकडून प्रमाणपत्र दिले जात होते. परंतु, सभागृहाचा कार्यकाळ रविवारी (१५) संपत असल्याने नागरिकांची गैरसोय टाळण्यासाठी वरील निर्णय घेतला आहे. अशाप्रकारचे मृत्यू प्रमाणपत्र नागरिकांनी मागणी केल्यास रजिस्टर्ड मेडिकल प्रॅिक्‍टशनर अथवा खासगी किंवा शासकीय दवाखान्यातील वैद्यकीय अधिकाऱ्यांनी आवश्‍यक ती तपासणी करुन मृत्यू प्रमाणपत्र द्यावे, या प्रमाणपत्राच्या आधारे स्मशानभूमी अथवा दफनभूमी येथे मृत व्यक्तींचे अंत्यसंस्कार होतील, याची नागरिकांनी नोंद घेऊन महापालिका प्रशासनास सहकार्य करावे, असे आवाहन आयुक्त डॉ. कादंबरी बलकवडे यांनी केले आहे.

संपादन - स्नेहल कदम