गडहिंग्लज - मूळची तालुक्‍यातील हसूरचंपूची आणि सध्या पुण्यात वास्तव्याला असलेल्या एका वृद्धेचा काल कोरोनाने बळी घेतला. 74 वर्षीय असलेल्या या वृद्धेचे कुटूंब सहा-सात वर्षापासून पुणे येथेच राहत असल्याने आणि सदरची महिला गावी आलीच नसल्याने गडहिंग्लज तालुक्‍याला कोणताही धोका नसल्याचे प्रशासनाने स्पष्ट केले आहे.

गडहिंग्लजपासून सात किलोमीटरवर हसूरचंपू गाव आहे. या गावातील एक कुटूंब सात वर्षापासून पुणे येथेच वास्तव्याला आहे. गावात त्यांचे जवळचे नातेवाईकही नाहीत. यामुळे हसूरचंपू ते पुणे कनेक्‍शनचा प्रश्‍नच येत नाही. सदरची महिला वर्षभरापूर्वी गावाकडे येवून गेल्याची चर्चा आहे. त्यानंतर त्यांचे कोणीही गावाकडे आणि गावातून त्यांच्याकडे गेलेले नसल्याचे सांगण्यात आले.

वाचा - ३ मे नंतर काय काय सुरू होणार? मुख्यमंत्र्यांनी दिलेत हे संकेत

दरम्यान, या कुटूंबातील 74 वर्षीच वृद्धेला कोरोनाची लागण झाली होती. तिचा आज औषधोपचार सुरू असताना मृत्यू झाल्याचे समजताच तालुक्‍यात उलट-सुलट चर्चेला उधाण आले होते. हसूरचंपू गावात याची माहिती देण्यात आली. प्रशासनाला माहिती कळताच तहसीलदार दिनेश पारगे यांनी गावकामगार तलाठी यांच्या माध्यमातून या कुटूंबाची अधिक चौकशी केली. हे कुटूंब सध्या गावाकडे आलेले नाही. शिवाय त्यांचे जवळचे असे कोणीच हसूरचंपूत राहत नाहीत. यामुळे नातेवाईकांशी संपर्क येण्याचाही प्रश्‍न येत नाही. म्हणून गडहिंग्लज तालुक्‍याला या घटनेचा कोणताही धोका नसून लोकांनी घाबरून जावू नये, असे आवाहन तहसीलदार श्री. पारगे यांनी केले आहे.